16:20 / 22.08.2017
12403

Yangi Android O tizimidan nimalar kutish mumkin?

21 avgust kuni Google korporatsiyasi Android operatsion tizimining O kod nomi ostidagi sakkizinchi versiyasini taqdim etdi. Qoidaga ko‘ra, Android versiyalari shirinliklar sharafiga nomlanadi - AndroidPolice ma'lumotlariga ko‘ra, yangi tizim Android Oreo deya nomlangan. Business Insider nashri Android'ning yangi versiyasida paydo bo‘ladigan eng asosiy yangilanishlar haqida ma'lumot berdi.

 

Tezlashtirilgan tizim - avvalgidan ikki barobar tezroq

 

 

Asosiy ekran satrida zaryad darajasi foizlarda aks etadi

Ilovalarda xabar berish belgilari paydo bo‘ladi

Yangi xabarlari o‘qilmagan ilovalarda nuqta ko‘rinishidagi belgi paydo bo‘ladi. Foydalanuvchi unga bosib turib, o‘qilmagan xabarlarni ko‘zdan kechirishi mumkin bo‘ladi.

 

"Suratda surat" rejimi

Videorolik yoki videoqo‘ng‘iroq oynasini kichiklashtirish mumkin, u boshqa ilovalarning ustida turadi. Bu bir vaqtning o‘zida ikki servisdan foydalanish imkonini beradi.

 

Alohida ilovalarning xabar beruvchi tovushini vaqtinchalik o‘chirish imkoni

Foydalanuvchi ilovalarni to‘liq o‘chirish yoki "bezovta qilmaydigan" rejimga o‘tkazish o‘rniga ba'zi ilovalar tovushini vaqtinchalik o‘chirib qo‘yishi mumkin bo‘ladi.

 

Matnni "aqlli" ajratish

Smart Text Selection funksiyasi ismlar va nomlarni avtomatik ravishda taniy boshlaydi - bu kerakli nomni istagan joyda ushlab turib, ajratish imkonini beradi.

Shuningdek bu funksiya telefon raqamlari va manzillarni ham taniy oladi, ular ajratilganda shu raqamdan yoki xarita ilovasidan foydalanishni taklif qiladi.

 

Google Play Protect himoya tizimi

Google Play Protect ilovalar va ularning funksiyalari foydalanuvchilarning qurilmalari va ma'lumotlariga ziyon yetkazmasligini nazorat qiladi.

 

Login va parollarni avtoto‘ldirish

Barcha ilovalar uchun Chrome'da saqlanib qolgan login va parollarni avtomatik tarzda to‘ldirish funksiyasi ishga tushadi. Masalan, agar Twitter'dagi profil ma'lumotlari Chrome'da saqlanib qolgan bo‘lsa, Android ularni Twitter ilovasida qo‘llashi mumkin.

 

Yangilanishni yetkazishning yangi tizimi

Android'ning asosiy muammosi shundaki, haddan tashqari kam qurilmalar tizimning so‘nggi versiyasigacha yangilanadi. Masalan, avgustning boshiga kelib, barcha Android-qurilmalarning atigi 13,5 foizigina - dolzarb 7.0 Nougat versiyasi boshqaruvi ostida va bor-yo‘g‘i 1,2 foizi so‘nggi yangilanish ostida ishlagan.

Google korporatsiyasi Android O bilan birga Treble nomli yangi tizimni ham namoyish qiladi, u Samsung, LG va boshqa kompaniyalar smartfonlaridagi tizimlar avvalgidan-da tezroq yangilanishi ta'minlaydi.

Top