Yangi paxta mavsumida ish haqlari ko‘tariladi va vaqtida beriladi

Bu yilgi paxta terimi mavsumida qo‘lda terilgan bir kilogramm paxta uchun 400 so‘mdan haq to‘lanishi rejalashtirilmoqda. Bu haqda «Kun.uz» manbasi xabar bergan.

Shuningdek, bu yil terilgan paxta uchun hisob-kitob har kuni dalaning boshida amalga oshiriladi, ish haqi har kuni o‘z vaqtida berilishi reja qilingan. 

Ma'lumot uchun, o‘tgan yili 1 kilo paxta uchun 285 so‘m, 2015 yilda esa 260 so‘mdan haq to‘langan. 

O‘tgan yillarda terilgan paxta uchun hisob-kitob har 5 kunda amalga oshirilishi belgilangan (amalda bu 10-15 kunga cho‘zilib ketish hollari ko‘p uchragan).

2017 yilda 3 mln.tonnadan ortiq paxta hosili terib olish mo‘ljallangan, yetishtirilgan paxtaning deyarli 100 foizi qo‘lda terib olinishi hisobga olinadi,  buning uchun 1 trillion 200 milliard so‘mdan ortiqroq mablag‘ talab etiladi. 

Qayd etish kerakki, 2017 yil paxta xom-ashyosining sotib olish narxlari hali e'lon qilinmadi. O‘tgan yili birinchi nav o‘rta tolali paxta xom ashyosining kilosi 999 so‘mdan 1333 so‘mgacha sotib olingandi.

21 avgust kuni O‘zbekiston Prezidenti «2017 yilda g‘o‘za defoliatsiyasini o‘z vaqtida va samarali o‘tkazish bo‘yicha kompleks tashkiliy chora-tadbirlar to‘g‘risida»gi qarorni imzoladi. Unga ko‘ra, paxta hosilini imkon qadar tezroq yig‘ishtirib olish ko‘zda tutilgan.