Режиссёр Пол Гринграсс норвегиялик террорчи Андерс Брейвик ҳақида фильм суратга олади, деб хабар бермоқда Deadline. Бу картинани яратиш ҳуқуқи учун жиддий кураш кечган бўлиб, унда Netflix онлайн-сервиси ғалаба қозонди.

Брейвик оммавий қотиллик учун 21 йиллик қамоқ жазосини ўтамоқда. 2011 йилнинг 22 июль куни у 77 кишини ўлдирганди.

Гринграссга келадиган бўлсак, у суперагент Жейсон Борн ҳақидаги фильмлар билан машҳур. Хусусан, у «Борн талаби» ва «Борннинг устунлиги» картиналарини суратга олган.

Маълумотларга кўра, суратга олиш ишлари Норвегияда маҳаллий актёрлар билан олиб борилади. Бюджет 20 млн долларни ташкил этади. Тайёгарлик шу ҳафтадан бошланади, бевосита ижодий ишлар эса кузда старт олади.

Нашрнинг таъкидлашича, Гринграсс тарихий фактлар асос қилиб олинган шунга ўхшаш қатор фильмлар устида ишлаган. Улар ичида – «Қонли якшанба» (1972 йилнинг 30 январида Шимолий Ирландияда юз берган ҳодисалар, ўшанда британиялик ҳарбийлар ирландиялар ҳуқуқи учун маршга чиққанларни ўққа тутган) ва «Йўқотилган рейс» (2001 йилнинг 11 сентябрь куни АҚШда террорчилар томонидан олиб қочилган ва Пенсильванияда қулаган самолёт ҳақида) картиналари бор.

Аввалроқ Брейвик исми-фамилиясини ўзгартиргани хабар берилганди.