KUN.UZ Москва шаҳрида “ЛексМобайл” юридик фирмасига асос солиб, меҳнат мигрантларига ҳуқуқий ёрдам кўрсатиб келаётган Ботиржон Шерматов билан суҳбат қилди. Мулоқот давомида Россиядаги Ўзбекистон элчихонаси ва у билан боғлиқ масалалар ҳақида ҳам тўхталиб ўтилди.

“Ўзбекистон элчихонаси билан боғлиқ масалаларга тўхталадиган бўлсак, биз мобиль дастур ишлаб чиқилишини сўраган бўлардик. Унда керакли бўлган тилларда зарур маълумотлар тезкорлик билан берилиб турилса яхши бўлади. Бизда элчихонада расмийлаштириладиган ҳужжатлар билан боғлиқ муаммолар бор. Битта мисол: четда паспортини йўқотган, у яроқсиз ҳолга келган ёки унинг муддати тугаган фуқароларимиз ватанга қайтиш учун вақтинчалик гувоҳнома олишади. У бир ой муддатга берилади. Шу нарсани олишда жуда кўплаб муаммолар бор. Биринчи навбатда – нархи. Ҳозирги кунда Ўзбекистон элчихонасида шундай гувоҳномани олиш 55 доллар туради. Қирғизистонда 35 доллар, Тожикистонда эса 10 доллар экан. Ўртадаги тафовут катта. Бундан ташқари, уларда бу нарсани расмийлаштириш осон. Бизда эса қийин. Элчихонани сайтида қайси ҳужжатлар кераклиги ёзилган, аммо қанча муддатда қилиниши ёзилмаган. Шунингдек, гувоҳномани олиш учун керак бўлган ҳужжатларнинг ичида фуқаро паспортини олган бўлинмадан маълумотнома тақдим этиши керак, деган жойи бор. Бу билан доимий муаммолар бор. Бу нарса консуллик бўлимининг ўзининг қўлидаги иш, одамларни қийнамасдан шу нарсалар қилинса, анча кишиларнинг вақти сарсонгарчиликдан қутиларди. 

Яқинда Москвадаги депортация бўлган хориж фуқароларини вақтинчалик ушлаб туриш жойига бордик. Бу ерда Ўзбекистоннинг 200 дан ортиқ фуқароси бор экан. У ерда бир муаммо бор - одамнинг ўзида чипта олишга маблағи бўлмаса, давлат томонидан пул ажратилишини кутишга мажбур. Бу эса чўзиладиган жараён. Бундан ташқари, у ерда паспорти йўқ одамлар ҳам бор. Улар унинг фуқаролигини тасдиқлатиш мақсадида Ўзбекистон элчихонасига сўров юборади. Бизнинг элчихонамиз эса ўша ташкилот томонидан 55 доллар тўланмагунча ўша гувоҳномани бермай турган экан. Уларнинг айтишича, ҳозирги кунда фақатгина Ўзбекистон, Туркманистон ва Африканинг бир давлати элчихонаси ўз фуқаролари учун пул талаб қилар экан. Бошқа давлатлар ўша ерда ўтирган фуқаросига ҳужжатни бепул беради ва улар чиқиб кетади. Бундай нарсалар одамнинг 4-5 ойлаб ўтиришига сабаб бўлмоқда”, - дейди Шерматов.

Маълумот учун, Ботиржон Шерматов билан суҳбатнинг тўлиқ шакли сайтда тез орада тақдим этилади.