Президентнинг 14.08.2017 йилдаги Ф–5022-сон фармойиши билан мамлакатимизда электр энергияси ва табиий газни назорат қилиш ва ҳисобга олишнинг автоматлаштирилган тизимларини (ЭНҲАТ) янада жорий этиш чора-тадбирлари қабул қилинди. Бу ҳақда Norma.uz хабар бермоқда.
 
Ўзбекистонга «SAGEMCOM» (Франция), «Landis & Gyr» (Швейцария) ва «Elster Metronica» (ГФР) каби хорижий компанияларнинг вакиллари таклиф этилади. Улар билан ЭНҲАТни жорий этиш лойиҳасини амалга оширишга тааллуқли қатор масалаларни муҳокама қилиш кўзда тутилмоқда.
 
Ривожланган давлатлар ва жаҳоннинг етакчи компанияларининг ўрганилган тажрибасини инобатга олган ҳолда лойиҳа концепцияси ва ЭНҲАТга техник талаблар қайта кўриб чиқилади. Сўнгра туманлар (шаҳарлар) рўйхатини кўрсатган ҳолда тизимни жорий қилишнинг 3 босқичи белгиланади ва энергия ресурсларини ҳисобга олиш приборлари, қўшимча асбоб-ускуналар ҳамда маълумотларни узатиш тизимларининг оптимал модделларини танлаш учун жой (маҳалла, даҳа, кўп квартирали уй) белгиланади.
 
Учрашувлар якунига кўра Президент аппаратига тегишли таклифлар киритилади.
 
Шунингдек, Ахборот технологиялари ва коммуникацияларини ривожлантириш вазирлиги таклифига биноан Сингапур Республикаси Миллий университети ҳузуридаги Электрон ҳукумат маркази мутахассислари мамлакатимизга келади. Улар билан музокаралар вақтида қуйидаги масалалар муҳокамаси кўзда тутилган:

•  АКТ соҳасини норматив-ҳуқуқий тартибга солишни такомиллаштириш, аҳолига давлат хизматлари кўрсатиш билан боғлиқ маъмурий тартиб-таомилларни оптималлаштириш;
•  жамиятнинг ҳаётий муҳим соҳаларини, биринчи навбатда соғлиқни сақлаш, таълим, ижтимоий ҳимоя, ишга жойлаштириш, коммунал хизмат кўрсатиш, транспорт хизматлари, алоқа соҳасини босқичма-босқич ахборотлаштириш ва автоматлаштириш;
•  АКТ соҳасида миллий кадрларни тайёрлаш, қайта тайёрлаш ва малакасини ошириш;
•  Ўзбекистонда электрон ҳукуматни янада ривожлантириш ва такомиллаштиришнинг стратегик йўналишларини ишлаб чиқиш;
•  кейинги ҳамкорлик бўйича битимлар тузиш.