АҚШ “Толибон” Афғонистон ҳукумати билан музокаралар столига ўтирмагунча, бу мамлакатда қўшинларини сақлаб қолиши ҳақида ишора берди. Бу ҳақда АҚШ давлат котиби Рекс Тиллерсон маълум қилди.  

“Трамп мудофаа вазири Мэттисга Афғонистонда қўшинлар сонини белгилаш ва мустақил қарорлар қабул қилишда қўмондонлик ваколатларини кенгайтириш каби кенг ваколатлар берган”, деб айтган Тиллерсон. Унинг қўшимча қилишича, толиблар охирги икки йил ичида олдинга силжиганлар, афғон ҳукумат кучлари эса уларни ортга қайтаришга қодир бўлмаган.

“Афғонистондаги стратегиямиз борасида катта ўзгаришлар бўлади. Бунинг барчаси “Толибон”га биз Афғонистонда қолишимиз ва ҳукумат ҳамда хавфсизлик кучлари билан биргаликда жангни давом эттиришимиз борасидаги ишорани жўнатишга қаратилган. “Толибон” ярашув жараёни ва мамлакатнинг самарали бошқарувини яратиш мақсадида афғон ҳукумати билан ҳамкорлик қилиши керак”, деб айтган АҚШ давлат котиби. Унинг айтишича, АҚШ бошқа ўзини Афғонистондаги қўшинлар сони ва уларнинг бу мамлакатда  қолишлари муддати билан чекламаслигини, бироқ”муайн вазиятдан келиб чиқиб иш кўришини” айтган.