Ўзбекистон Республикаси Вазирлар Маҳкамасининг 24 августдаги 955-Ф-сонли фармойиши асосида Ўзбекистон Пенчак-Силат федерацияси ҳамкор ташкилотлар билан биргаликда жорий йилнинг 9 сентябрь куни “Бунёдкор” стадионида  “ASIAN FIGHT – 2017” халқаро турнирини ташкил этмоқда. 

Халқаро турнирда Пенчак Силатнинг профессионал йўналиши бўйича Ўзбекистон ва хорижлик спортчилар иштирокида 8 та жанг бўлиб ўтиши режалаштирилган. 

Мазкур тадбир Ўзбекистон нуфузини дунё миқёсида янада оширишга, етишиб келаётган ёш авлодда соғлом турмуш тарзи, хусусан спортга муҳаббатни мустаҳкамлашда муҳим аҳамият касб этади. 

Мусобақа мавқеини янада кўтариш, бутун дунё спорт ишқибозлари диққат-эътиборини юртимизга қаратиш мақсадида фахрий меҳмонлар, хусусан, жаҳон кино ва жанг санъати усталари Жан Клод Ван Дамм, Жеф Монсон ва Фёдор Емельяненко кабилар таклиф этилган. Шунингдек, халқаро турнирдан олдин фахрий меҳмонлар иштирокида алоҳида дастур асосида ёш спортчилар ва киноактёрлар учун мастер-класслар ва матбуот анжумани ўтказилади. 

Шу муносабат билан, “Asian Fight - 2017” ташкилий қўмитаси барча ОАВ вакилларини 30 август чоршанба куни бўлиб ўтадиган матбуот анжуманига таклиф этади. Матбуот анжуманида “Asian Fight - 2017” ташкилий қўмитаси аъзолари, Ўзбекистон Пенчак силат федерацияси ва “Sunrise Entertainment” масъулияти чекланган жамияти раҳбарлари билан турнирга оид тайёргарлик жараёни ва фахрий меҳмонларнинг ташрифига доир хабарлар ОАВга маълум қилинади. 

Шундай қилиб, “Алишер Навоий” номидаги Ўзбекистон Миллий кутубхонасида соат 10:00 да бошланадиган матбуот анжуманига барча турдаги ОАВ вакиллари таклиф этилади.