Germaniyaning Hamburg shahrida boks bo‘yicha AIBA shafeligi ostida o‘tkazilayotgan jahon chempionati chorakfinal o‘yinlari bo‘lib o‘tmoqda. Ma'lumki, bugun bo‘lib o‘tayotgan chorakfinal janglarida to‘qqiz nafar bokschimiz qatnashmoqda.
69 kg.gacha bo‘lgan bokschilar o‘rtasida kechgan juda chiroyli jangda Shahram G‘iyosov angliyalik Pet MakKormakdan to‘liq ustunlik qildi va 5:0 hisobida yutdi. U yarimfinalga yo‘l olgan beshinchi bokschimiz bo‘ldi.
Hakamlarning ushbu jangga raundlar bo‘yicha qo‘yilgan yakuniy bali quyidagicha bo‘ldi:
Qozog‘iston - 30:27, Janubiy Koreya - 29:28, Vengriya - 29:28, Jazoir - 29:28, Latviya - 30:27
Eslatib o‘tamiz, bugun vakillarimiz ishtirokida bo‘lib o‘tgan dastlabki jangda 49 kg vazn toifasida Hasanboy Do‘smatov hindistonlik Amit Kumarni 5:0, 64 kg.gacha bo‘lgan vazn toifasida Iqboljon Xoldorov germaniyalik Artyom Harityunyanni 3:2 hisobida yengib yarim finalga yo‘l olishgan edi.
Chorakfinalning 75 kg.gacha bo‘lgan vazn toifasida Isroil Madrimov AQSh vakili Troy Aysliga qarshi ringga ko‘tarildi va ochkolar bo‘yicha 2:3 hisobida yengildi.
So‘ngra 91 kg.gacha bo‘lgan bokschilar ishtirokida chorakfinal jangida ishtirok etgan 19 yoshli vakilimiz Sanjar Tursunov niderlandiyalik Roy Korvingga qarshi jang o‘tkazdi va 4:1 hisobida g‘alaba qozondi.
52 kg.gacha bo‘lgan chorakfinal jangida hamyurtimiz Jasurbek Latipov kolumbiyalik Seyber Avilaga qarshi ringga chiqdi va 4:1 hisobida g‘alaba qozondi.
60 kg.gacha bo‘lgan bokschilar o‘rtasida kechgan jangda hamyurtimiz Elnur Abduraimov gurjistonlik bokschi Otar Eranosyanga qarshi jang o‘tkazdi va 5:0 hisobida yutqazdi.
Chorakfinal janglarida qatnashayotgan qolgan bokschilarimiz quyidagi soatlarda ringga chiqishadi.
81 kg. Chorakfinal. 29 avgust. 23:30
Bektemir Meliqo‘ziyev (O‘zbekiston) - Yerik Aljanov (Qozog‘iston)
91+ kg. Chorakfinal. 29 avgust. 23:55
Bahodir Jalolov (O‘zbekiston) – Qamchibek Qo‘nqaboyev (Qozog‘iston)
