АҚШ фуқароси Элизабет Райҳерт Германиянинг Кёльн шаҳри ҳайвонот боғига 22 млн доллар маблағни хайрия қилди. Бу ҳақда Koelner Stadt-Anzeiger газетаси хабар берган.

Райҳертлар оиласи Германиядан Қўшма Штатларга Иккинчи жаҳон урушидан сўнг кўчиб кетган. Нашр маълумотларига кўра, 2015 йилда Элизабет ҳайвонот боғи директорига хайрия ҳақида электрон мактуб йўллаган. Кейинчалик 93 ёшли Элизабет боғнинг банкдаги ҳисоб рақамига ҳар ойда 6 минг евродан пул ўтказиб турган.

Элизабетнинг тушунтиришича, ҳайвонот боғига маблағ юбориш ҳақидаги ғоя 1998 йилда вафот этган турмуш ўртоғи Арнульфга тегишли бўлган. Аёлнинг айтишича, Кёльн учун ҳайвонот боғи Кёльн ибодатхонаси каби машҳур жойдир. "Умид қиламанки, Кёльнга бу ёқади... Биз уни ҳеч қачон унутмаганмиз", - дея таъкидлаб ўтди аёл.