ЖЧ-2018 саралаш босқичининг Осиё минтақасида иштирок этадиган Ўзбекистон ва Жанубий Корея терма жамоалари учрашуви олдидан кореяликлар устози Шин Тхэ Ёнг ва футболчи Сонг Ҳёнг Мин матбуот анжуманида иштирок этди.

— Тошкентга келганингиздан кейин жамоа ўзини қандай ҳис қилмоқда?
— Бу ердаги шароит яхши. Корея ошхонасидан ошпаз чақирганмиз. Фақат бу ерда кундузи бироз иссиқ экан. Аммо кечга бориб футбол ўйнашга мос ҳаво ҳукм сурмоқда. Бу эса эртанги ўйин олдидан жуда муҳим.

— Футболчига савол: Жамоанинг ҳозирги аҳволи қандай? Ўйинга тайёргарлик ҳақида гапириб беринг.
— Ўзбекистонга қарши учрашувларда жуда кўп марта майдонга тушганман. Шу боис бу борада тажрибам етарли. Жамоадошларим билан бу ўйинни жуда кўп муҳокама қилишга улгурдик.

— Ўзбекистоннинг Хитойга қарши ўйинини кўргандирсиз. Уларга нима етишмади деб ўйлайсиз?
— Бу саволни рақиб жамоа ва ҳамкасбимга берганингиз яхши. Рақиб жамоани ҳурмат қилган ҳолда бу саволга жавоб бермаганим маъқул деб ўйлайман.

— Эртага жамоа плей-оффга ҳам тушиб қолиши мумкин. Бунга тайёрмисиз?
— Плей-офф ҳақида ўйлаб кўрганимиз йўқ. Биз фақат ғалаба учун майдонга тушамиз. 

— Умуман клубда («Тоттенҳэм») тўп сурганингиз каби, терма жамоада ўйнай олмаяпсиз? Бу нима билан боғлиқ? Ўзингизга ҳам шу сезиляптими?
— Биз учун энг муҳими жамоа. Биринчи навбатда айнан жамоа манфаатлари учун ҳаракат қиламиз. Ким гол уришининг фарқи йўқ. Кимнинг ўйини зўр чиқишини ҳам. Асосийси жамоавий ютуқ. Терма жамоадаги ўйинларидан мен ҳам қониқиш ҳосил қилаётганим йўқ. Лекин асосий жамоага кўмак берсам бўлди. Эртага майдонга тушаманми йўқми, билмайман лекин имконият берилса, бор кучим билан ҳаракат қиламан.

— Эртанги ўйинда психологик тайёргарлик ҳам жуда муҳим. Бунда сиз қандай тайёргарлик кўрдингиз ва футболчиларни қай тарзда тайёрладингиз?
— Эронга қарши учрашувда яхши имконият бор эди. Аммо ундан фойдалана олмадик. Шу боисдан қандайдир хотиржам бўла олганимиз йўқ. Бу учрашув олдидан бошқаттан ўзимизни руҳан қўллаб-қувватлаб олишимизга тўғри келди. Яхши кайфиятда тушиб ғалаба қозонишга ҳаракат қиламиз.

— Самвел Бабаян билан учрашувларингиз ҳақида гапириб беринг.
— Биринчи даврада Сонгнинг иккита гол билан ютгандик. Биринчи учрашувда эса Олимпия терма жамоасига мураббий бўлганида кўришганмиз. Унинг жамоаси билан битта меҳмонхонада турганмиз. Алоқаларимиз жуда яхши бўлган.

— Жароҳат олган Ки Сунг Ёнг ҳақида. У жароҳатидан тўлиқ тузалдими? Майдонга туша оладими?
— Ўша учрашувда шовқин-сурон билан коммуникациялар орқали асл вазиятни била олмагандик. Стадион жуда шовқин эди ва бу боис таваккал қила олмасдик. Аммо жароҳат жиддий бўлиб чиқмади ва у эртага майдонга туша олиши мумкин бўлади.

— Ўзбекистонга қарши энг қийин ўйин қайси бўлган?
Сонг Ҳёнг Мин: — Ўзбекистонга қарши учрашувда барча учрашувлар қийин бўлган. Шу боисдан алоҳида бир учрашувни ажратиб кўрсата олмайман. Эртага биз жуда ноқулай рақибга қарши ўйнаймиз.
— Жанубий Корея терма жамоаси меҳмонда бирорта ҳам ғалаба қозона олмаган. Эртага ниманинг эвазига бу вазиятни енгиб ўтиб, ғалаба қозонмоқчисиз?
Мураббий: — Меҳмонда шу пайтгача ютмадикми? Худди шу сабаб билан энди эртага ғалаба қозонмоқчимиз.

Азамат Муродов ёзиб олди.