O‘zbekiston Respublikasi Ichki ishlar vazirligi Yo‘l harakati xavfsizligi bosh boshqarmasi haydovchilarga murojaatnoma bilan chiqdi.
«Yo‘l intizomni yoqtiradi. Intizomli haydovchilarning esa yo‘llari hamisha ravon bo‘ladi. Ammo afsuski, so‘nggi vaqtlarda ayrim haydovchilarimiz, ayniqsa, yuk avtomobillari haydovchilari tomonidan dam olmasdan, charchoq holatlarini, ob-havo sharoitlarini inobatga olmasdan, yo‘l harakati xavfsizligi talablarini qo‘pol ravishda buzib, tungi vaqtda uzoq muddat transport vositasini boshqarish kabi mas'uliyatsizliklar insonlar o‘limiga sababchi bo‘layotgan og‘ir oqibatli yo‘l-transport hodisalarini keltirib chiqarmokda», - deyiladi murojaatnomada.
Jumladan, qayd etilishicha, 2017 yil 24 avgust kuni soat 02:00larda, Qashqadaryo viloyati Qarshi shahri hududida, haydovchi, Qarshi tumanida yashovchi I.A. “GAZ-53” rusumli yuk avtomobilini boshqarayotib, shu yo‘nalishda yo‘lning o‘ng tomonida to‘htab turgan, haydovchi, Qarshi tumanida yashovchi Ch.T. boshqaruvidagi “ZIL MMZ-554” rusumli yuk avtomobilini orqa chap tomoniga urilib, to‘qnashuv sodir etgan.
2017 yil 25 avgust kuni soat 19:45larda, Jizzax viloyati Paxtakor tumani hududida, haydovchi Sirdaryo viloyati Oqoltin tumanida yashagan R.Sh. shaxsiy «NeKSIYa» rusumli avtomobilini boshqarayotib, shu yo‘nalish bo‘ylab oldinda orqaga qayrilmoqchi bo‘lib to‘xtab turgan, haydovchi Buxoro viloyati Jondor tumanida yashovchi V.O. boshqaruvidagi «ZIL-130» rusumli yuk avtomobilini orqa tomoniga urilib to‘qnashuv sodir etgan.
2017 yil 27 avgust kuni soat 07:00larda, Qashqadaryo viloyati Dehqonobod tumani hududida, haydovchi Qoraqolpog‘iston Respublikasi To‘rtko‘l tumanida yashovchi D.B. shaxsiy «ISUZU» rusumli yuk avtomobilini boshqarayotib, qarshisidan harakatlanib kelayotgan, haydovchi Surxondaryo viloyati Denov tumanida yashagan T.E. boshqaruvidagi «NeKSIYa» rusumli avtomobilini yo‘liga chiqib to‘qnashuv sodir etgan.
2017 yil 29 avgust kuni soat 03:30larda, Samarqand viloyati Samarqand tumani hududida, haydovchi Pastdarg‘om tumanida yashovchi B.Sh. «KamAZ-5410» rusumli yuk avtomobilini boshqarayotib, boshqaruvni yo‘qotib yo‘lning o‘rta qismiga o‘rnatilgan beton to‘siqqa urilib, to‘xtagan vaqtida, shu yo‘nalish bo‘ylab orqasidan harakatlanib kelayotgan, haydovchi Nurobod tumanida yashagan B.M. «DAMAS» rusumli avtomobili bilan ushbu yuk avtomobilini orqa tomoniga urilib to‘qnashuv sodir etgan.
Bu mas'uliyatsizlik natijasida kelib chiqayotgan bir nechta holatlar xolos. Achinarlisi ushbu hodisalar tez-tez sodir bo‘lib, begunoh insonlar o‘limiga sababchi bo‘layapti.
