Литва мудофаа вазири Раймундас Кароблис Евроиттифоққа аъзо давлатлар мудофаа вазирлари билан учрашув давомида «ҳарбий Шенген» ташкил этиш таклифи билан чиқди. Бу ҳақда мамлакат ҳарбий маҳкамаси матбуот хизматидан хабар беришган.

«Литва ЕИ давлатларининг мудофаа соҳасидаги қалин ҳамкорлигини олқишлайди. Доимий ҳамкорлик Европа Иттифоқида мудофаага харажатларни ошириш ва Европада ҳақиқий мудофаа кучларини яратишга хизмат қилиши керак», - дея маълум қилди вазир.

Унинг таъкидлашича, Литва «шенген лойиҳаси»ни ишлаб чиқишни таклиф этаяпти.

«Биз Бенилюкс давлатлари, Финляндия ва Эстония билан бирга PESCO доирасида ҳарбий шенген лойиҳасини ишлаб чиқишни таклиф этмоқдамиз, у Европада қўшинлар ҳаракатланишини енгиллаштиради. Бу ўз ичига инфратузилмага сармояларни соддалаштиришни қамраб олади. Бу лойиҳа кўплаб мамлакатлар томонидан қўллаб-қувватланмоқда, унинг амалга оширилиши ЕИ ва НАТО учун муҳимдир», - деди Кароблис.

Аввалроқ Литвадаги мактабларда ҳарбий тайёргарлик дарслари пайдо бўлиши хабар берилганди.