Самарқанд шаҳридаги «Ўзбекистон» маҳалласи нафақат шаҳар, балки вилоят ва республикада ҳам энг намунали ва обод маҳаллалардан бири ҳисобланади. Ушбу маҳалла сўнгги 15 йилда мамлакат миқёсидаги турли кўрик танловларда бир неча марта ғолиб ва совриндорлар қаторидан ўрин олгани ҳам бежиз эмас, албатта.

Ана шу маҳалла идорасининг шу кунгача барча ҳавас қиладиган ҳовлиси шаҳар ҳокимлигининг қарори билан (!) бир кунда теп-текис қилиб ташлангани бутун маҳалла аҳлини эсанкиратиб қўйди. Ахир, 60–70 йиллик манзарали, камида 20 йиллик мевали дарахтларнинг ўзини қайта тиклаш учун яна шунча вақт керак. Қолаверса, маҳалла атрофини ўраб турган темир панжаралар, иккита фаввора, иккита ҳовузга қўшиб бутун маҳалла ҳовлиси ер билан яксон қилинган.

Шундай қилиб, «Ўзбекистон» — энг обод маҳалладан, энг хароб маҳаллага айланди қолди. «Бузилишлар» бошида турган тадбиркорнинг бу ерда кўп қаватли бино қуриши режалаштирилгани масалани бироз ойдинлаштирди.

Ҳозир одамлар кўп қаватли бино қуриб, сотиш учун нималар қилишмаяпти. Муҳим ижтимоий аҳамиятга эга иншоотлар дейсизми, аҳоли зич жойлашган ҳудуддаги бирдан бир чиқиндихона дейсизми, ҳамма ҳаммасини мутасадди ташкилотларнинг тадбиркорга ҳатлаб беришига ундовчи қандайдир бир «ғайритабиий куч» борга ўхшайди. Ана шу аксариятнинг кўзи илғамас куч бу сафар шаҳар ҳокимлигини «бор-е» дея бус бутун маҳаллани тадбиркорга бериб юборишга ундаганга ўхшайди.

— Аслида масала шаҳар ҳокимлигига етиб боргунча ҳам бир қатор кўзбўямачиликларга йўл қўйилган, — дейди маҳалла фаоли Сайфулла Суюнов. — Маҳалламиз бузилишидан олдин, кўпчиликдан пинҳон тарзда, маҳалла фуқаролари вакиллари йиғилишининг навбатдан ташқари ишчи гуруҳи мажлиси уюштирилиб, уч қаватли бино, маҳалла учун ҳам янги бино қурилиши масаласи кўтарилган экан. 18 киши имзоси билан «фуқаролар томонидан маъқулланди» мазмунида мажлис баёни ҳам тузилган. Холбуки маҳаллада 4000 нафар фуқаро истиқомат қилади. Қоида бўйича бу каби ҳужжатларнинг ҳақиқий ҳисобланиши маҳалладаги жами аҳоли вакилларининг учдан икки қисми иштирок этиши, уларнинг камида 51 фоизи маъқуллаши лозим эди. Юқоридаги ҳужжатда эса, маҳалладаги 96 нафар аҳоли вакилларидан бор йўғи 3 киши қатнашган, холос. Кўзбўямачилик деганимнинг сабаби шунда.

Маҳалла аҳли ушбу ҳолат бўйича Ўзбекистон Республикаси президенти Девонига мурожаат қилгач, шаҳар ҳокимлиги томонидан «тегишли шаҳарсозлик ҳужжатлари тайёрланиб, мутасадди ташкилотлар томонидан тасдиқлатилгунга қадар қурилиш ишлари тўхтатилди» мазмунида жавоб келади. Бундан шуни тушуниш мумкинки, шаҳар ҳокимлиги шаҳарсозлик ҳужжатлари тайёрланмасдан туриб, мутасадди ташкилотлар томонидан тасдиқлатилмасдан тадбиркорга «мен нима экан дебман» қабилида рухсат бериб юборган экан-да.

Шундан кейин ушбу ҳолат шаҳар прокуратураси томонидан ҳам ўрганиб чиқилгач, Самарқанд шаҳар ҳокимининг жорий йил 10 апрелдаги 700-Қ қарори, яъни, маҳалла ҳудудидан кўп қаватли бино қурилиши бўйича рухсат, қонунга зид, деб топилади. Жорий йил 14 августида шаҳар ҳокими В.Раҳимов ўз қарорини бекор қилиш тўғрисида қарор чиқаради.

Хуллас, жорий йилнинг апрел ойида бошланган ана шу ўзбошимчалик, эътиборсизлик ва масъулиятсизлик ортидаги ғавғо август ойига келиб қонуний ечимини топади. Минг афсуски, ўртада маҳалла идорасининг харобага айлангани қолди. Хўш, маҳаллага етказилган зарарни энди ким тўлаб беради?

Анвар МУСТАФОҚУЛОВ,

«Зарафшон» газетасидан.