Германия федератив республикаси канцлери Ангела Меркель Берлин Қримни Россияга тегишли деб ҳисобламаслигини маълум қилди. Меркель хоним бундай фикрни Frankfurter Allgemeinen Sonntagszeitung учун берган интервьюсида айтиб ўтган.

Канцлер Қримни Россия ҳудуди сифатида тан олиш ҳақида эшитганида, ГДР билан бўлган вазиятни эслашини айтиб ўтган. 

«Мен бунга шундай ёндашаман: Агар ўшанда ГДР бизга шундай муносабатда бўлганида, «Германия бўлинди, ҳеч нарса ўзгармайди», дейишганида нима бўларди», — деган Меркель.

У тарихдан сабоқ олиш кераклигини қайд этган.

«Биз адолатсизликка кўнишимиз керак эмас», деган у. Бу орқали Меркель хоним Германия эркин демократик партияси етакчиси Кристиан Линднернинг август ойида Қримни Россиянинг бир қисми сифатида тан олиш кераклиги ҳақида айтган гапларига муносабат билдирган.

«Қрим ҳеч қачон Украина таркибига қайтмайди. Санкциялар фойда бермайди. Россия Европада катта куч ва биз бу давлатни Европа тартибига қўшишимиз керак», — деганди у Berliner Morgenpost учун берган интервьюсида.

Худди шундай баёнот сентябрь ойида Германия Социал-демократик партияси раҳбари, канцлерлик лавозимига даъвогар Мартин Шульц томонидан ҳам билдирилганди. «Менга шундай туюладики, руслар буни фавқулодда чора сифатида қўллашган», — дея изоҳ билдирган у. Шульц шу билан бирга ярим орол Россия таркибига қўшиб олиниши халқаро ҳуқуқ қоидаларига зид эканини қўшимча қилган.

Қрим 2014 йил мартида ўтказилган референдумдан кейин Россия таркибига қўшилганди. Расмий Киев референдум натижаларини тан олмади. Москва томони эса референдум халқаро ҳуқуқ нормалари доирасида бўлиб ўтганини таъкидлади.

2014 йилда бир қатор давлатлар, жумладан, АҚШ ва Европа Иттифоқи давлатлари Москва билан муносабатларда чекловлар жорий қилишни бошлади. 2017 йил июнида иқтисодий санкциялар 2018 йилнинг 31 январига қадар узайтирилди. Бундан ташқари, Россия ва Украинадаги юридик шахсларга индивидуал санкциялар амалда.