10:42 / 11.09.2017
14400

Hillari Klinton prezident bo‘lishiga to‘sqinlik qilgan xatosini ma'lum qildi

Foto: CBS news

AQShning sobiq davlat kotibi va sobiq prezidentlikka nomzod Hillari Klinton 2016 yilgi prezidentlik saylovida g‘alaba qozonishga imkon bermagan asosiy xatosini ma'lum qildi. Uning fikricha, ish yozishmalarini shaxsiy elektron pochta orqali amalga oshirgani uning eng jiddiy xatosidir. 

"O‘ylashimcha, men yo‘l qo‘ygan xatolarning eng asosiysi shaxsiy elektron pochtadan foydalanish bo‘ldi", — degan Klinton CBS telekanaliga bergan intervyuda. U Donald Trampga mag‘lubiyatini izohlar ekan, shunday fikrlarni bildirgan. 

Shu bilan birga, uning ta'kidlashicha, u buning uchun javobgar emas. "Men bu haqda avval ham aytganman, yana takrorlayman, javobgarlik mening zimmamda emas. U shunchalik salbiy ohangda yetkazildiki, men undan qutila olmadim, u esa to‘xtamadi", — degan sobiq davlat kotibi. 

Hillari Klinton 2009-2013 yillarda davlat kotibi bo‘lganida ishga doir yozishmalarini xususiy serverlar orqali amalga oshirgan. Uni ma'lumotlarni oshkor qilishda hamda aynan uning aybi bilan davlat sirlari oshkor bo‘lganida ayblashgan edi.

Top