Самарқанд шаҳридаги Шоҳи Зинда кўчаси узра пиёдаларни Ислом Каримов кўчасига олиб чиқадиган замонавий йўл ўтказгич барпо этилди, деб ёзади «Самаркандский вестник» газетаси.

Ўзбекистон Республикасининг Биринчи президенти Ислом Каримов дафн этилган жойда — Ҳазрати Хизр масжиди атрофида ёдгорлик мажмуаси барпо этилиши муносабати билан ҳудудда кенг миқёсдаги реконструкция ва ободонлаштириш ишлари амалга оширилмоқда.

Бажарилган ишлар натижасида қисқа муддат ичида Воҳид Абдуллаев ва Шоҳи Зинда кўчалари кесишмаси таниб бўлмас даражада ўзгариш касб этди. Мажмуа зиёратчилари учун шароитларни яхшилаш мақсадида бу ерга зиналар, айвонлар ва автомашиналар тўхташ жойлари барпо этилди.

— Шоҳи Зинда кўчаси узра барпо этилган пиёдалар йўл ўтказгичи бир ярим ой ичида қуриб битказилди, — дейди «Самвилоятқурилишсервис» МЧЖ директори ўринбосари Акмал Тўхтамуродов. — Айни пайтда ҳудудни ободонлаштириш ишларида элликка яқин одам банд.

Биринчи президентнинг ёдгорлик мажмуаси 2018 йилнинг 30 январида — Ислом Каримов таваллудига 80 йил тўлиши муносабати билан очилиши кўзда тутилган.

Журналистлар Р.Ёрмуҳаммад ва А.Харитонов (фото) хабари.