O‘zbekiston Myanmadagi rohingyalarga gumanitar yordam ko‘rsatadi

O‘zbekiston Myanmadagi vaziyat, ayniqsa ushbu mamlakatda musulmon ozchilikni tashkil etuvchi rohingyalarga nisbatan zo‘ravonlik holatlari haqidagi xabarlarni tashvish bilan qarshi oldi. Bu haqda O‘zbekiston TIVning seshanba kuni e'lon qilingan bayonotida aytilgan.

«Inson huquqlari umumjahon deklaratsiyasi va BMT Nizomida belgilab qo‘yilgan tamoyillar, shuningdek Islom hamkorlik tashkiloti maqsad va vazifalariga tayangan holda O‘zbekiston zo‘ravonlikning har qanday ko‘rinishini qoralab, irqi, teri rangi, jinsi, tili, dini, siyosiy yoki boshqa qarashlari, millati yoki ijtimoiy kelib chiqishi, mol-mulki, biror tabaqaga mansubligi yoki jamiyatdagi o‘rnidan qat'i nazar, har bir insonning barcha huquq va erkinliklari so‘zsiz ta'minlanishini yoqlab chiqadi», — deyilgan bayonotda.

«Shu munosabat bilan biz Myanma hukumatini begunoh musulmonlarga qarshi zo‘ravonliklarga barham berish va ularning oldini olish uchun barcha zarur choralarni qo‘llashga chaqiramiz», — deya qayd etiladi xabarnomada.

TIV, shuningdek O‘zbekiston hukumati myanmalik qochqinlar ehtiyojlari uchun gumanitar yordam yuborish to‘g‘risida qaror qabul qilganini bildirgan.