Jan Klod Van Dammning o‘g‘li hibsga olindi

Belgiyalik aktyor Jan Klod Van Dammning kenja o‘g‘li, 21 yoshli Nikolas Van Varenberg biryo‘la bir necha ayblovlar bo‘yicha hibsga olindi. Xususan, u giyohvand moddalarni saqlash, birovni noqonuniy ozodlikdan mahrum qilish va qurolli hujum sodir etishda gumon qilinmoqda, deya xabar beradi TMZ.

Manbaga ko‘ra, voqea Arizona shtatidagi Tempe shahrida ro‘y bergan. Varenbergning qo‘shnilari politsiyaga qo‘ng‘iroq qilib, uning liftni o‘ynab, ishdan chiqarayotganini aytishgan. Voqea joyiga yetib kelgan huquq himoyachilari yigitning kvartirasiga olib boruvchi qon izlarini aniqlashgan. Varenbergning qo‘shnisi eshikni ochib, uning qo‘li qonaganini aytgan.

Shundan so‘ng politsiya xodimlari ortlariga qaytishga qaror qilishgan. Kutilmaganda pastda o‘sha qo‘shni ularga yetib olib, Varenbergning kvartirasidan qochib chiqqani, Van Dammning o‘g‘li unga pichoq o‘qtalib tahdid qilganini ma'lum qilgan. Qo‘shnining so‘zlariga ko‘ra, uning huquq-tartibot xodimlariga eshikni ochgani yigitga yoqmagan. 

Varenbergning xonasi tintuv qilinganda politsiya xodimlari u yerdan xuddi o‘sha pichoq va marixuana topishgan.