Айни пайтда жаҳонда нефтга бўлган талабнинг 57 фоизи транспорт истеъмоли ортидан келиб чиқмоқда, дейилади OPEC маълумотларида. Хитой ҳукуматининг ташаббуси нефть бозорини қай аҳволга солади? Forbes шу ҳақидаги маълумотлари билан бўлишди.

Саноатнинг гуркираб ўсиши ва автомобиллар сонининг кескин ортиши шусиз ҳам оғир аҳволда бўлган Хитойнинг йирик шаҳарлари экологик ҳолатини янада мураккаблаштирмоқда. Ҳукумат ҳавонинг ифлосланиши, иқлимнинг ўзгариши ва нефть импортидан жиддий ташвишга тушмоқда. Хитой саноат ва информацион технологиялар вазири ўринбосари Син Гуобиннинг сўзларига кўра, Хитой ушбу масаланинг ечими сифатида бензин ва дизель ёнилғисида юрадиган автомобиллардан тўлиқ воз кечмоқчи. 

Жаҳоннинг ҳажм жиҳатидан иккинчи иқтисодиёти ҳисобланувчи Хитой бензин ва дизель ёнилғисида ҳаракатланувчи автомобиллардан босқичма-босқич воз кечишни ният қилган бошқа давлатлар қаторига қўшилди. Франция, Буюк Британия, Испания ва Германия мамлакатлари 2030–2040 йилларни ички ёнув двигателига эга автомобиллардан тўлиқ воз кечиш даври сифатида белгилаган. Ҳиндистон ҳам 2030 йилгача шундай тақиқловни жорий этишни кўриб чиқмоқда. 

Хитой ва хорижий автомобиль компаниялари Хитойда фойдаланиш учун электромобиллар ва гибрид қурилмали машиналар ишлаб чиқариши мумкин бўлади. Гибрид автомобилларда ҳаммага маълум бўлган ички ёнув двигатели электродвигатель ва батареялар билан жиҳозланади. Анъанавий двигателлардан тўлиқ воз кечиш босқичма-босқич амалга оширилади. Тақиқловнинг бошланиш санаси ҳозирча маълум қилинмади. Фақат шуниси маълумки, Хитой электромобиллар учун мажбурий квоталар жорий этишга ҳозирлик кўрмоқда. 

Хитой бундай автомобилларни ишлаб чиқаришни субсидиялар орқали рағбатлантиради ва машиналарни сотиб олганлар учун рўйхатдан ўтказиш жараёнини осонлаштиради. Маълумотларга кўра, 2016 йилда Хитойда 265 минг янги электромобил сотилган — бу эса, Европа Иттифоқи ва АҚШни қўшганда ҳам улардан кўп дегани. Таққослаш учун, 2016 йилда бутун Европада 116 мингта шундай автомобиль сотилган. 

Электромобиллар ва гибрид автомобилларнинг сотувдаги улуши 2018 йилнинг охиригача 8 фоизга, 2020 йилда 12 фоизга, 2025 йилда эса 20 фоизга етиши мумкин. Шундай қилиб, саккиз йилдан сўнг Хитойдаги ҳар бир янги автомобиль экологик тоза бўлади.

Bloomberg таҳлилчиларининг прогнозига кўра, 2025 йилга бориб, электромобилларнинг нархи бензин ё дизелда юрадиган автоларники билан бир хил бўлади. 2038 йилга бориб, фақатгина бензин ва дизелда ишлайдиган автомобиллардан кўра электромобиллар кўпроқ ишлаб чиқарила бошлайди.