Жаҳон допингга қарши агентлиги (ЖДҚА) Сочи Олимпидасидан кейин Ричард Маклареннинг махсус ҳисоботида номлари келтирилган россиялик 95 нафар спортчига нисбатан даъволаридан воз кечди. Бу ҳақда ички ҳужжатларга асосланган ҳолда The New York Times нашри ёзмоқда. Ҳозирча, тергов ишлари тўхтатилгани расман эълон қилингани йўқ.
 
Газетанинг ёзишича, ЖДҚА мутахассислари 96 нафар спортчининг ишини ўрганишни якунлаган, улардан фақат бир ҳолатда допинг қўлланилишининг етарли исботи топилган. Шу билан бирга, спортчилар исми-шарифи ҳам келтирилмаган. 

ЖДҚА вакиллари россиялик спортчиларга қарши ишларни қайта кўриб чиқишда Москва допингга қарши лабораторияси собиқ раҳбари Григорий Родченковга мурожаат қилишмаган. 

«Унинг кўрсатмаларини олиш имконияти мавжуд эмаслиги айрим ишларнинг ёпилишига сабаб сифатида кўрсатилган», — дея ойдинлик киритган Родченков адвокати Жим Уолден. Шу билан бирга, Уолден сўзларига кўра, аслида уларга бирорта мактуб келмаган.