Японияда 18 тартиб рақамини олган “Талим” тўфони сабабли маҳаллий авиакомпаниялар камида 585 та маҳаллий ва халқаро рейсни бекор қилишди. 

Япониянинг JAL (Japan Airlines) ва ANA (All Nippon Airways) каби йирик авиакомпаниялари мос равишда 151 та ва 225 та маҳаллий рейсни бекор қилишга мажбур бўлди. Peach Aviation компанияси 53 та маҳаллий ва халқаро рейсни қолдирган. Jetstar эса 43 та рейс қолдирилишини маълум қилган. Шунингдек, тўфон сабабли Japan Air Commuter, Skymark airlines, Solaseed Air, Spring Japan, Japan Transocean ва Vanila Air компаниялари умумий ҳисобда 114 та рейсни бекор қилишган.

Айни вақтда “Талим” тўфони Япониянинг жанубидаги Кагосима префектурасида кузатилиб, шимоли-шарқий йўналишда ҳаракатланмоқда. Унинг марказидаги босим 975 гектопаскални, шамол кучи сониясига 30 метрни ташкил қилмоқда. Об-ҳаво мутахассисларининг фикрича, тўфон сабабли Кюсю ва Сикоку оролларида душанбагача 350 мм ёғингарчилик тушиши мумкин.