Покистон шимоли-ғарбидаги Қабилалар федерал бошқармаси ҳудудида масофадан туриб бошқарилувчи портловчи қурилма ҳаракатга келиши натижасида камида беш киши ҳалок бўлди, улардан бири амалдор. Бу ҳақда Geo TV телеканали хабар тарқатди.

Ҳодиса якшанба кунининг биринчи ярмида Баджаур агентлиги ҳудудидаги Навагай туманида рўй берган. Маъмурият вакиллари маълумотига кўра, бомба йўл четида портлаган.

Хавфсизлик хизмати ходимлари ҳудудни ўраб олишган ва террорчиларни қидиришни бошлашган. Ҳозирча ҳеч бир ташкилот ушбу портлаш учун жавобгарликни ўз зиммасига олмади.

Қабилалар яшовчи бу ҳудуд Афғонистон билан чегарадош ҳисобланиб, Покистоннинг энг беқарор ҳудуди ҳисобланади. Март ойида Покистон ҳукумати "Қабилалар ҳудуди"ни Хайбер-Пахтунхва вилояти билан бирлаштириш ҳақида қарор қабул қилганди.