Яқинда Apple компанияси iPhone 8 ва iPhone 8 Plus смартфонларини тақдим этди. Қурилмалар ҳақидаги илк фикр-мулоҳазалар эса у қадар ижобий эмас - бунга ундан-да инновацион ва қимматбаҳо iPhone X смартфонига бўлган қизиқиш ҳам сабаб бўлган бўлиши мумкин, дейилади Marketwatch'да.

Кўпчилик iPhone 8 — салмоқли смартфон экани ва iPhone'нинг эски моделлари эгалари учун ажойиб харид эканини таъкидламоқда. Шундай экан, сизда iPhone 7 бўлса, у ҳолда янгисини харид қилиш у қадар аҳамиятли эмас, чунки унда янгиликлар кўп эмас.

Хўш, фойдаланувчилар iPhone 8 ҳақида нималар дейишмоқда?

Жеффри Фаулер (The Wall Street Journal) iPhone 8 унга "Трансформерлар"нинг бешинчи фильмини ёдга солганини маълум қилди:

"Унинг янги қурилма эканини аниқ биласан. Бироқ шу билан бирга у аввалгисидан нимаси билан фарқ қилишини айта олмайсан".

Фаулер iPhone X'нинг сотувга чиқишини кутишни маслаҳат берди. "Кимга симсиз заряд ва янгиланган камера керак бўлмаса, бир неча юз доллар тежаб, 550 долларга iPhone 7 харид қилиши мумкин".

Николь Нгуен (Buzzfeed) ҳам сезиларли янгиланишлар йўқлигини қайд этди:

"Умуман олганда, iPhone 8 — илгари iPhone 7s номи  берилиши мумкин бўлган смартфон".

Дэвид Пирс (Wired) iPhone 8 ва 8 Plus'ни "деярли мукаммал телефонлар" деб атаб, юксак баҳолади.

Шундай бўлса-да, кетидан қўшимча қилди: "Барибир улар эскирмоқда. Бизни келажакда қандай смартфонлар кутаётганини билишни хоҳлайсизми, iPhone X'га қаранг. -

iPhone 8 — ҳойнаҳой, бугунги авлоднинг сўнгги энг яхши смартфони ва унинг нархи 1000 доллар эмас, бу - ажойиб янгилик".

Нилэй Пател (The Verge) ҳам iPhone 8'да ҳеч қандай янгилик топа олмади:

"iPhone 8 — айфонларнинг тўртинчи авлоди, iPhone 6 ҳам шу авлодга мансуб. Apple саккизинчи айфон учун "мутлақо янги дизайн" ишлаб чиққанини маълум қилганди. Бироқ компания iPhone 6S ва 7 ҳақида ҳам шундай деган. Ягона фарқ - орқа шиша, лекин ундан бошқа ҳеч нарса ўзгармаган. iPhone 8 ва 8 Plus учун 7 ва 7 Plus'нинг ғилофлари ҳам тўғри келади".

Фарҳод Манжу (The New York Times) iPhone 8'ни "янги авлод олдидан ажойиб зинапоя" деб атади:

"iPhone 8 — оққушлар қўшиғи ёки, бошқача айтганда, бу биринчи iPhone'нинг қайта ишланган мукаммал варианти, нафақага чиқишдан олдинги нафис жозиба. iPhone 8 ва 8 Plus — ажойиб телефонлар. Бироқ янгиликларнинг аксарияти iPhone 7 ва 7 Plus'га нисбатан аҳамиятсиз. Бироқ сизда айфоннинг эски модели бўлса, у ҳолда саккизинчи смартфон сиз учун ажойиб харид бўлади".

Дэвид Пог (Yahoo Finance)нинг айтишича, iPhone 8 "ёқимли, бироқ аҳамиятсиз":

"Технологиялар олами iPhone X'ни орзиқиб кутмоқда. Яхшики, Apple уни ишлаб чиқарди, акс ҳолда муҳокамага арзийдиган нарсанинг ўзи бўлмасди, чунки тақдимотда намойиш қилинган iPhone 8'да ҳеч қандай янгилик йўқ".

Таҳлилчилар, ўз навбатида iPhone 8 учун олдиндан олинган буюртмалар ўзини оқламаслигидан чўчишмоқда.