KUN.UZ таҳририятининг Қўқон шаҳрига сафари чоғида ушбу шаҳарда истиқомат қилувчи Зарифахон Охунжонованинг бир қизи билан оилавий можаро сабаб кўчада қолиб кетгани, Ўзбекистон туманидан ижарага уй топиб, яшаш шароити йўқ ҳолда қолгани хақида хабар берилганди. 

Таҳририят яхши ният билан хайрия акциясини ҳам ташкил этди. Ўтган давр мобайнида яхши одамларнинг ёрдами билан ушбу оилага кўмак берилди. Сайтда чиққан мақоладан сўнг Қўқон шаҳар ҳокимияти оилани уй билан таъминлади. Хайриядан тушган маблағлар эса уларнинг яшаш шароитини яхшилашга сарфланади. KUN.UZ сайти мазкур маблағларни топшириш учун Зарифахон опанинг хонадонида бўлди.

“Сизларнинг ёрдамингиз билан шунча ғамхўрлик кўрсатишди. Менга кўмак қўлларини чўзган барча инсонларга катта раҳмат, ҳамма ниятларига етишсин. Шу кунларга етишганимга раҳмат. Бу ердаги қўшниларим жуда яхши экан. Хабар олиб туришибди. Лекин жуда тинч, яхши жой экан. Одам интилиб, яхши кунлар албатта келади, деб яшаши керак экан. Қизимга ҳам ҳар доим шуни айтаман. Ўтган кунларни энди эслама, дейман. Очиғи, буларнинг бари мўъжизага ўхшайди. Икки кунда уй олиб беришларига ишонмагандим. ”, - дейди Зарифахон опа кўзидан сизиб чиқаётган ёшларни артар экан.

 

Опанинг қизи сўзларига кўра, ишлаб чиқариш билан шуғулланишни режалаштирган. “Чеварчиликни ўргансам, шу соҳада бирон нарсани ишлаб чиқараман. Балки, кичик тикув цехини очишга ҳаракат қиларман. Буларнинг барини ўқишни битирсам амалга оширишни мўлжаллаганман”, - дейди Зарифахон опанинг қизи.

Эзгу, хайрли ишлар давомли бўлсин. Бу каби ишлар ўзбек халқининг фазилатидир. Хайрия акциясида иштирок этган барча юртдошларимизга миннатдорчилик билдирамиз. 

Шунингдек, Зарифахон опа ва унинг қизи паспорти масаласини ижобий ҳал қилишга ёрдам берган ҳамда қизнинг ўқиши билан боғлиқ муаммони ҳал қилиб беришга ҳаракат қилаётган Қўқон шаҳри ҳокимлигидан ҳам миннатдормиз.

Бундан ташқари, август ойида опанинг ҳолидан хабар олган ва унга ногиронлик аравачасини тақдим этган Mehrob.uz сайти ходимларига ҳам катта раҳмат!