Ўзбекистон Республикаси Вазирлар Маҳкамасининг "2017 йил ҳосили пахта хом ашёсининг харид нархлари тўғрисида”ги қарори эълон қилинди. 

Давлат эҳтиёжлари учун сотиб олинадиган пахта хом ашёси етиштиришни кўпайтиришни рағбатлантириш ҳамда пахта етиштирувчи хўжаликларнинг молиявий ҳолатини янада мустаҳкамлаш мақсадида Вазирлар Маҳкамаси қарор қилди:

Ўзбекистон Республикаси Молия вазирлиги, Иқтисодиёт вазирлиги, Қишлоқ ва сув хўжалиги вазирлиги, «Ўзпахтасаноатэкспорт», «Ўзагротехсаноатхолдинг» холдинг компаниялари ҳамда Ўзбекистон Фермерлари кенгашининг 2017 йил ҳосили: 

пахта хом ашёси харид нархларини 1-иловага мувофиқ миқдорда белгилаш;

машинада терилган пахта хом ашёси харид нархларини 2-иловага мувофиқ миқдорда белгилаш;

қўлда терилган пахта хом ашёсининг 1 килограмми учун биринчи босқичда — 450 сўмдан, иккинчи босқичда 2017 йил 1 октябрдан бошлаб — 500 сўмдан тўлаш;

машинада терилган пахта хом ашёсининг 1 тоннаси учун 260 000 сўмдан тўлаш тўғрисидаги таклифи маъқулланди.

Ўзбекистон Республикаси Молия вазирлиги, Қишлоқ ва сув хўжалиги вазирлиги «Ўзпахтасаноатэкспорт» холдинг компанияси, Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда пахта етиштирувчи фермер хўжаликларига 2017 йил ҳосили пахта хом ашёси харид нархларининг бир ҳафта муддатда етказилишини таъминлаш вазифаси топширилди.

Ўзбекистон Республикаси Вазирлар Маҳкамаси ҳузуридаги Қишлоқ хўжалиги маҳсулотларининг давлат хариди ва қишлоқ хўжалигини техника билан жиҳозлашни мақсадли молиялаштириш жамғармаси, Ўзбекистон Республикаси Марказий банки «Ўзпахтасаноатэкспорт» холдинг компанияси, «Агробанк» АТБ ва бошқа тижорат банклари, Қорақалпоғистон Республикаси Вазирлар Кенгаши ҳамда вилоятлар ҳокимликлари билан биргаликда пахта йиғим-теримида, уни ташишда ва тайёрлашда қатнашаётган ходимларга иш ҳақининг ўз вақтида тўланишини таъминлайдилар.

Пахта етиштирувчи фермер хўжаликларига амалда топширилган пахта хом ашёси учун теримчиларга терим пулларини ушбу қарорда белгиланган тариф ставкаларидан келиб чиққан ҳолда ҳар беш кунда, зарурат бўлганда эса — ҳар куни тўлаш тавсия этилди.

Қорақалпоғистон Республикаси Вазирлар Кенгаши, вилоятлар ва туманлар ҳокимликлари пахта теримчиларига терим пулларининг ушбу қарорда белгиланган тариф ставкалари бўйича ўз вақтида тўланиши юзасидан қатъий назорат ўрнатадилар.

Пахта йиғим-теримини уюшқоқлик билан ўтказиш учун жойларда камида 100 нафар теримчидан иборат бўлган теримчилар отрядлари ташкил этилади.

«Ўзпахтасаноат» акциядорлик жамияти пахта йиғим-терими мавсумида ташкил этиладиган теримчилар отрядлари раҳбарларини пахта тозалаш корхоналари билан тузиладиган фуқаролик-ҳуқуқий шартномалар асосида ишга қабул қилади.

«Агробанк» акциядорлик тижорат банкига — «Ўзпахтасаноат» акциядорлик жамияти ташкилотларига теримчилар отрядлари раҳбарларига ўз вақтида иш ҳақи тўлаш учун 45 млрд сўм миқдорида кредит маблағлари ажратиш тавсия этилди.

Ўзбекистон Республикаси Молия вазирлиги «Ўзпахтасаноатэкспорт» холдинг компанияси билан биргаликда 2017 йил ҳосили пахта толаси учун улгуржи нархлар прейскурантини ишлаб чиқиш ва тасдиқлашда пахта тозалаш корхоналарининг теримчилар отрядлари раҳбарлари иш ҳақини тўлаш бўйича харажатларини назарда тутади.

«Ўзпахтасаноатэкспорт» холдинг компанияси:

Жамғарма билан биргаликда пахта етиштирувчи фермер хўжаликлари билан пахта хом ашёсининг 90 фоизи учун — жорий йилда ва қолган 10 фоизи учун — 2018 йилнинг 1 апрелигача прейскурант нархлар бўйича ўз вақтида ҳисоб-китоб қилинишини;

«Ўзпахтасаноат» акциядорлик жамияти билан биргаликда 2018 йилнинг 10 январигача бўлган муддатда Жамғармага 2017 йил ҳосили пахта хом ашёси учун якуний 10 фоизли тўловлар учун маблағлар йиғма маълумоти тақдим этилишини таъминлайди.

Пахта етиштирувчи фермер хўжаликлари билан ҳисоб-китобларнинг тўғри ва ўз вақтида амалга оширилиши ҳамда ажратилган маблағлардан мақсадли фойдаланилиши юзасидан масъулият «Ўзпахтасаноатэкспорт» холдинг компанияси ва «Ўзпахтасаноат» акциядорлик жамияти раҳбарлари зиммасига юкланди.

Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — қишлоқ ва сув хўжалиги вазири З.Т.Мирзаев ҳамда «Ўзпахтасаноатэкспорт» холдинг компанияси раиси А.С.Камалов зиммасига юкланди.