Туркманистон пойтахти Ашхобод шаҳрида бўлиб ўтаётган Ёпиқ иншоотлар ва жанг санъати бўйича V Осиё ўйинларининг 10-мусобақа куни бошланди.

Гарчи бугун турнир бошланганидан буён энг кўп — 39 комплект медаллар ўйналса-да, вакилларимиз иштирокидаги мусобақаларда финаллар кам. Шу сабабли медаллар рўйхатида пастлашимиз мумкин.

 

Спортчиларимизнинг бугунги кун тартиби қуйидагилардан иборат:

  • Соат 09:00 дан 12:30 гача боулингчиларимиз жамоавий мусобақада иштирок этишади.
  • Соат 09:00 дан 12:30 гача эркаклар ва аёллар шахмат жамоамиз рапид йўналишида дона суришади. 23 ёшгача бўлган эркаклар ва аёллар жамоамиз соат 16:00 дан 18:30 гача мусобақалашишади.
  • Соат 13:30 дан 18:00 гача рақс спорти бўйича вальс, Венс услубидаги вальс, секин фокстрот турларида вакилларимиз яримфинал, ундан ўта олишса финалда иштирок этишади.
  • Соат 10:00 да теннисчимиз Санжар Файзиев ҳиндистонлик Натаражан Вижайга қарши яримфиналда кортга чиқади.
  • Кикбоскчиларимиз пойнт файтингда Хумоюн Фармонов (69 кг) яримфиналда, Жаҳонгир Ҳусанов (79 кг) чоракфиналда, лоу кикда Жавоҳир Элбоев яримфиналда даврага чиқишади.
  • Самбочиларимиздан Раҳматжон Аҳмедов (57 кг) — 1/8 финалда Акмалиддин Каримов (Тожикистон),   Нуриддинжон Тилаволдиев (74 кг) — 1/8 финалда Юсуф Каримиён (Эрон), Истам Қудратов (74 кг) — 1/8 финалда Муҳаннад Шом (Сурия), Ирина Кулакова (64 кг) — чоракфиналда Ойжамол Қурбонова (Туркманистон), самбо курашида Улуғбек Ҳакимов (62 кг) — чоракфиналда, Беҳзод Нурматов (82 кг) — 1/8 финалда Жавлонбек Мадаминов (Туркманистон), Олим Худойқулов (+100 кг) — чоракфиналда Тилак Кузбаков (Қозоғистон), Лутфулла Сайдаматов (57 кг) — 1/8 финалда Пуриват Супапитакпонг (Тайиланд) га қарши курашга киришади.
  • Соат 10:00 дан 11:45 гача сузиш мусобақасида финал ўйинлари бўлиб ўтади. Артём Козлюк 100 м комплекс сузишда, Алексей Тарасенко 100 м эркин усулда, Хуршиджон Турсунов 100 м эркин усулда, Даниил Букин, Алексей Тарасенко, Артём Козлюк, Хуршиджон Турсунов 4Х100 м эстефетада сузишади.
  • Оғир атлетикачимиз Рустам Жангбаев (+105 кг) соат 15:30 дан бошлаб финал мусобақасида иштирок этади.
  • Соат 11:00 дан бошлаб Эркин кураш мусобақаси ҳам старт олади ва Ихтиёр Наврўзов (70 кг) — чоракфиналда Эломон Дугдурбек уулу (Қирғизистон), Умиджон Исманов (86 кг) — Салим Хўжаев (Тожикистон), Давит Модзманашвили (125 кг) — 1/8 финалда Фарҳод Аннақулов (Тожикистон), Севара Эшмуратова (53 кг) — чоракфиналда Мардиатул Ангграини (Индонезия), Асем Сайдаметова (58 кг) — чоракфиналда Дао Ти Ҳуонг (Вьетнам) га қарши кураш олиб боришади.

Эслатиб ўтамиз, ҳозиргача 105 та медал (21 та олтин, 28 та кумуш ва 57 та бронза) жамғарган Ўзбекистон спортчилари медаллар сифати бўйича 4-ўринда, сони бўйича 2-ўринда боришмоқда.