Саудия Арабистонида аёлларга ҳайдовчилик гувоҳномалари олишга рухсат берилди. Бу ҳақдаги қарорни қирол Салмон бин Абдулазиз Ал Сауд қабул қилди.

SPA ахборот агентлигининг таъкидлашича, аёлларнинг машина ҳайдаш ҳуқуқи шариат қонунларига кўра амалга оширилади. Шу билан бирга қироллик ҳукумати аёлларга автомобилни бошқаришга тақиқловнинг бекор қилинишининг “ижобий томонлари”ни кўрсатган.

Саудия Арабистонида аёлларга машинани ҳайдашга расман тақиқлов мавжуд бўлмаган, бироқ ҳайдовчилик гувоҳномасини фақатгина эркаклар олишлари мумкин бўлган. Агар жамоат жойларида машина ҳайдаётган аёл пайқалса, у ҳибсга олиниши ёки йирик миқдорда жаримага тортилиши мумкин бўлган.

Саудия Арабистонида охирги йиллар ижтимоий тармоқларда ушбу тақиқловга қарши норозилик акциялари бўлиб ўтган.