Ўзбекистон футбол федерацияси президенти Умид Аҳмаджонов ташкилотда эски раҳбарлар билан ишлаган ходимлар бўйича саволга жавоб берди.

— Эски раҳбарият билан ишлаган шундай ходимлар борки, бугунги футбол мухлисининг улардан тоқати тоқ бўлган. Ўша раҳбар бўлиб ишлаган мутахассислар умуман мухлислар, журналистлар орасидаги обрўсини тўкиб бўлган. Истасангиз исм-фамилияси билан айтишим мумкин. Мисол илгари ташкил қилинган Терма жамоалар маркази раҳбари бўлиб ишлаган Асқар Толибжонов, ёки ПФЛ раҳбари Фарход Магомедов. Буларга ҳурмат сақлаган ҳолда айтиш керак. Улар ўзига билдирилган ишончни умуман оқлай олмади, вазифасини бажара олмади. Шу каби ЎФФ ва ПФЛ обрўсини тўкиб бўлган мутахассислар билан бирга ишлашда давом этасизми ёки қандайдир ўзгаришлар бўладими?

— Умуман ЎФФ ва ПФЛда ҳам эски штатлар жадвали қайта кўриб чиқилмоқда. Яқинда эълон берамиз, ташкилотга қўйилган талаблар бўйича ишга таклиф қилинади. Кимгадир ёқса-ёқмаса ҳам айтишга мажбурман: ЎФФда ишлаб келган ходимлар 90 фоизга янгиланади, дея гапириб ўтди Аҳмаджонов.