Ўзбекистон Республикаси Президентининг 2017 йил 5 июлдаги «Ёшларга оид давлат сиёсати самарадорлигини ошириш ва Ўзбекистон ёшлар иттифоқи фаолиятини қўллаб-қувватлаш тўғрисида»ги фармонига асосан, маданият вазирлиги раҳбар ва масъуллари иштирокида тизимдаги ёшлар билан очиқ мулоқот ва учрашувлар ўтказиб келинмоқда.

Навбатдаги учрашув мумтоз қўшиқ, замонавий ва миллий эстрада, опера йўналишида яккахон ҳамда жамоа шаклида ижод қилаётган ёш ижрочилар  иштирокида бўлиб ўтди. Мулоқотда Ўзбекистон Республикаси Маданият вазири Бахтиёр Сайфуллаев ва вазирликнинг тегишли бошқарма бошлиқлари иштирок этдилар, деб хабар беради KUN.UZ’га маданият вазирлиги ахборот хизмати.

Конференцияда Ўзбекистон Республикаси Маданият вазирига эстрада, опера хонандалари, театрлар актёрлари, мумтоз қўшиқ ижрочилари томонидан чет элда бўладиган танловларда иштирок этиш, санъаткорларнинг муаллифлик ҳуқуқини ҳимоя қилиш, хонандаларнинг ўз ижод маҳсулларини телевидение орқали эфирга узатишнинг молиявий томонларини бирмунча муқобиллаштириш, шунингдек, мусиқали театр актёрларининг мусиқий чиқишларини телевидение орқали ҳам эфирга узатиш, асарларни оммага мунтазам етказиш, эстрада санъатини ривожлантириш ва ёш истеъдодли хонандаларни кашф этиш мақсадида ташкил қилинган, ҳозирда фаолиятини  тўхтатган «Ботир Зокиров» номидаги кўрик-танловни яна қайтадан ташкил қилиш, театрлар ва спектаклларни аҳоли орасида кенг тарғиб қилиш яратилаётган ижодий маҳсулларни сифатини янада ошириш ҳақида саволлар, муаммолар, таклифлар ўртага ташланди.

Ушбу савол ва таклифларга вазир тегишли чора тадбирлар ишлаб чиқилиши ҳамда  амалиётга татбиқ этилишини таъкидлади. Барча ижод аҳлига «Ўзбекконцерт» давлат муассасаси томонидан одоб-аҳлоқ  йўриқномаси ишлаб чиқилаётгани айтилди. Очиқ мулоқот тарзида ўтган тадбирда барча таклиф ва муаммолар ўз ечимини топди, тегишли тизим ташкилотларига аниқ режалар ишлаб чиқиш белгиланди.