Ўзбекистон президенти Шавкат Мирзиёев Марказий Осиё раҳбарлари ўртасида мунтазам равишда маслаҳатлашувлар ўтказиш ташаббусини билдирди. Бу ҳақида Ўзбекистон Республикаси Ташқи ишлар вазири Абдулазиз Комилов Халқаро Пресс-клубнинг навбатдаги сессияси вақтида маълум қилди. 

«Мен барчани Президентимиз томонидан олға сурилган аҳамиятли ташаббусга эътибор қаратишини сўраб қоламан. Бу ерда фақат Марказий Осиё давлатлари раҳбарлари ўртасида маслаҳатлашувлар ташкил этилиши кўзда тутилган. Бунинг учун ҳеч қандай янги ташкилот тузиш мақсад қилинмаган. Бундан ташқари, қандайдир уставлар, қарорлар қабул қилиниши ҳам режага киритилмаган. 1990-2000 йилларда Марказий Осиёда Иқтисодий иттифоқ, ташқи сиёсий иттифоқ тузиш учун ҳаракатлар бўлган эди. Бироқ бу режалар амалга ошмади. Сабаби, айрим ҳал этилмаган масалалар мавжуд бўлган бир вақтда тўсатдан бориб, қандайдир шартномалар тузиб бўлмайди. Шу сабабли, минтақада йиғилиб қолган муаммоларни, долзарб масалалар устида аввал ўтириб, ҳеч бир мажбуриятсиз, ҳужжатларсиз ёки ташкилотлар иштирокисиз ўзаро фикр алмашиш керак. Давлатлараро ишончни  кучайтириш керак. Ундан сўнг, биз амалий ишларга ўтишимиз мумкин. Президентимиз ташаббуси эса мана шундай майдонни яратиб беради», дея қайд этди Абдулазиз Комилов.

Ташқи ишлар вазирининг таъкидлашича, мазкур ташаббуснинг амалга ошиши натижасида Марказий Осиёдаги раҳбарлар очиқ-ойдин фикр алмашиб, мураккаб масалаларга ҳамжиҳатликда ечим топишади. 

«Бундай тажриба ҳозирча ҳеч қаерда кузатилмаган. Маслаҳатлашув учрашувларини Ўзбекистонда ёки бошқа мамлакатларда ўтказиш мумкин. Барча эзгу ишлар - яхши қадамдан бошланади. Ўйлаймизки, биз келажакда ушбу тажрибани янада ривожлантирамиз», дея қўшимча қилди ТИВ раҳбари.