2017 йил учун Нобел мукофоти совриндорларининг исми-шарифи 2-9 октябрь кунлари эълон қилинади, деб хабар қилмоқда Нобел жамғармаси матбуот хизмати.

Ҳафталик Стокголмдаги Каролин тиббиёт институтида жойлашган Нобел қўмитасида бошланади. Унда физиология ва тиббиёт йўналиши бўйича совриндорлар маълум бўлади. 

3 ва 4 октябрда Швеция қироллик академиясининг Нобел қўмитаси кимё ва физика йўналишининг ғолиблари номига ойдинлик киритади. Адабиёт бўйича мукофот кимга берилиши 5 октябрда эълон қилинади. 

2016 йили адабиёт бўйича Нобел мукофотига америкалик шоир ва композитор Боб Дилан муносиб кўрилган эди. Аммо мукофотни айнан Диланга бериш қарори Швецияда турли фикрларни келтириб чиқарди. Шундан сўнг, Диланнинг мукофотни расман топшириш маросимига келмагани, Нобел лауреати сифатида анъанавий нутқини кечиктиргани баҳс-мунозараларга сабаб бўлди.

2017 йилги Нобел мукофотларининг совриндорларини эълон қилиш 6 октябрь куни Ослода давом этади. Норвегия Нобел қўмитаси шу куни тинчлик мукофоти соҳибини ёки соҳибларини эълон қилади. Бу йил унга 318 нафар киши номзоддир. Улардан 215 киши жисмоний шахс, 103 таси жамоат ва халқаро ташкилотлардир. 

Нобел мукофотини топшириш ҳафталиги 9 октябрь куни Стокгольмда Швеция қироллик академияси иқтисодиёт соҳасида Нобел мукофоти кимгаа насиб этишини маълум қилади. У 1968 йили Швеция давлат банки томонидан Альфред Нобел хотирасига бағишлаб таъсис этган. Альфред Нобелнинг ўзи 19-аср охирида атиги 5 та мукофотни васият қилган. 

2017 йилги ҳар бир мукофот учун бериладиган пул миқдори 9 миллион швед кронасини (1 млн АҚШ доллари) ташкил этади.

Таъкидлаш ўринлики, номзодлар рўйхати 50 йил мобайнида сир сақланади ва шу муддатдан кейин эълон қилиниши мумкин. Мукофотлаш 10 декабр куни Стокгольм ва Ослода бўлиб ўтади. Ўша куни швециялик ихтирочи, саноатчи, тилшунос ва файласуф Альфред Нобел вфот этган. Ўтган йили умумий ҳисобда АҚШ, Япония, Франция, Нидерландия ва Колумбияда ишлайдигаан 11 киши Нобел мукофоти соҳиблари бўлди.