2017 йил 2 октябрь куни Жиноий ишлар бўйича Тошкент шаҳар Миробод тумани судида П.Боровский номли тиббиёт коллежи талабаси Жасур Иброҳимов ўлими юзасидан суд мажлисининг 3-куни бўлиб ўтди. Унда суд мажлиси раиси судья М.Матчанов, давлат айбловчиси Акромов, судланувчи ва унинг адвокати Тохиров, жабрланувчи Н.Алиева ҳамда адвокати Исмоилова, кенг жамоатчилик, ОАВ вакиллари қатнашди. 

Суднинг 3-кунги мажлисида мазкур жиноят ишида гувоҳ сифатида қатнашаётган, П.Боровский коллежининг 3-босқич талабалари Бойзатов Тимур ва Собиров Бегзод кўрсатмалари тингланди.

Икки гувоҳнинг кўрсатмасидан сўнг, суд раиси, прокурор, судланувчи ва жабрланувчи адвокатлари ўзларини қизиқтирган саволлар билан гувоҳларга мурожаат қилишди.

Қайд этиш жоизки, гувоҳлар кўрсатмаларининг айрим жойларида бир-бирига зид бўлган қисмлар мавжуд эди. Суд раиси мажлис сўнгида судланувчи И.Тўлагановга мурожаат қилиб, гувоҳларнинг кўрсатмаларини тасдиқлаши ёки рад этиши хусусида фикрини сўради.

Судланувчи Исломбек Тўлаганов икки гувоҳнинг умумий кўрсатмаларини тасдиқлагани ҳолда, Т.Бойзатовнинг айрим кўрсатмаларини инкор этди. 

Ушбу иш бўйича навбатдаги суд мажлиси 2017 йил 5 октябрь куни бўлиб ўтиши белгиланди.