Каталония жамоатчилик ташкилотлари ва касаба уюшмалари раҳбарлари бугун, 3 октябрь куни ялпи иш ташлаш ўтказади.

Шу тариқа улар Испания полицияси ва Миллий гвардиянинг 1 октябрь кунги мустақиллик ҳақидаги референдум иштирокчиларига нисбатан қўллаган шафқатсиз чораларига норозилик билдиришмоқчи.

Каталония Миллий ассамблеяси ва Omnium Cultural ташкилоти аҳолини маҳаллий вақт билан соат 12:00да (Тошкент вақти билан соат 15:00) бошланадиган иш ташлаш тадбирларида фаол қатнашишга чақирган.

Бугун Барселонада жамоатчилик транспортлари - автобуслар ва метро ишламайди. Шаҳардан ташқарига қатновчи поездлар ҳаракатида чекловлар қўйилган. Темирйўл компаниялари жами 151та поезд ҳаракатини тўхтатган. Бундан ташқари, аэропортларда иш ҳажми қисқарган. Музейлар, театрлар ва кўргазмалар ёпилади.

«Барселона» ва «Жирона» клублари ҳам бу иш ташлашга қўшилган, клублар бугун ёпиқ бўлади, машғулотлар ўтказилмайди.

Каталония ҳукумати раҳбари Карлес Пучдемон ҳукумат Европа Иттифоққа мурожаат қилиб, референдум чоғида инсон ҳуқуқлари бузилгани ҳақидаги масалани кўриб чиқишни талаб қилишни режалаштиргани ҳақида айтди.

2 октябрь куни Каталония ҳукуматининг расмий вакили Жорди Турул Барселонадаги матбуот анжуманида референдум иштирокчиларининг 90 фоизи Испаниядан ажралиб чиқиш учун овоз берганини маълум қилганди.

Каталония ҳукуматининг сўнгги маълумотларига кўра, 1 октябрь — ҳудуд мустақиллиги ҳақидаги референдум ўтказилган кунда — полиция билан тўқнашувлар натижасида 844 киши жабрланди.