Россия энергетик ҳафтаси панелли сессиясида чиқиш қилар экан, РФ президенти Владимир «Россия Эроннинг миллий манфаатларига ҳурмат билан қарайди, лекин миллий манфаатлар Россияда ҳам, Туркияда ҳам, Саудия Арабистонида ҳам бор», деб таъкидлаб ўтди. Путиннинг гапларини РИА Новости келтирмоқда.

Бошловчи РФ президентига Саудия Арабистони билан муносабатлар мустаҳкамланаётгани фонида Суриядаги можаролар ниҳоялангач, Россия у ердаги вазиятни қандай тасаввур этаётгани ҳақида, Суриядаги зиддиятлар тугагач, Россия Саудия Арабистонига эронлик ҳарбийлар Суриядан чиқиб кетишига кафолат бера оладими, дея савол берди.

Путиннинг таъкидлашича, мамлакат ўз йўлини ўзи белгилаб олмоғи лозим, «бу ушбу давлат халқининг суверен ҳуқуқи». «Бу нарса тўлалигича Эронга ҳам тааллуқли. Биз доимо ҳар қандай давлатнинг суверенитети, ички ва ташқи сиёсатига ҳурмат билан қараганмиз. Эрон бизнинг қўшнимиз, азалий ҳамкоримиз, биз буни қадрлаймиз ва Эроннинг миллий манфаатларига ҳурмат билан қараймиз, бироқ миллий манфаатлар Россияда ҳам, Туркияда ҳам, Саудия Арабистонида ҳам бор», — деди Путин.

«Биз бу ташвишларни тушунамиз, боз устига, турли томондан янграётган қарши ташвишларни ҳам беэътибор қолдира олмаймиз. Масалан, ҳозир ҳаммани Ироқдаги вазият ташвишлантирмоқда — унинг қай тарафга қараб ривожланиши, Ироқ Курдистонидаги референдум масаласи — у ер ҳам минтақавий ички муаммолар гирдобида қолган. Агар киши ўзини ушбу жараённинг барча қатнашувчиларини қониқтирувчи келишув ва ечимлар излаб топишга йўналтирса, вазият барқарорлашади», — деди Россия президенти.

«Бизда ҳаммани бирлаштирувчи жиҳат бор, энди эса баҳс мавзуси бўлган нарсаларга тақалмасдан, умумий манфаат йўлида бирлашиш керак, шунда бизни муваффақият қарши олади», — дея саволга жавобини якунлади Путин.

Ироқ Курдистонига нисбатан нефть эмбаргосининг жорий этилиши нефть нархининг ўсишига олиб келади, бироқ ҳеч ким бундай йўл тутмаса керак, деди Путин.

«Бу умумбашарий энергетика бозорларида ўз аксини топади ва нархлар тепага қараб ўса бошлайди. Фикримча, бундан ҳеч ким манфаатдор эмас, шу сабабли реал ҳаётда юз берадиган воқеаларга синчиклаб қараш керак ва ҳар қандай тахминлар вазиятни издан чиқаришга хизмат қилмаслиги лозим», — деди Путин ушбу автоном ҳудуддан нефть етказиб бериш тўхтатиб қўйилса нима бўлади, деган саволга жавоб бера туриб.

Путин ҳозирча 2018 йилги президентлик сайловларида қатнаниш борасида бир тўхтамга келмаганини айтиб ўтди; асосий номзодлар ноябрь ойининг охири — декабрь ойининг бошларида ўз режаларини эълон қилишади.

Сессия модератори «Кимга қарши ўз номзодингизни қўясиз, бу борасида бир тўхтамга келдингизми?» — деб савол берганди.

«Йўқ, нафақат кимга қарши кураш олиб боришим, умуман, ўз номзодимни илгари суриш борасида ҳам бир қарорга келганимча йўқ», — деди Путин.

«Фикримча, йил охирига бориб асосий номзодлар ўз қатнашувини ва сайловолди дастурларини эълон қилишади», — дея тушунтириш берган Россия президенти.