6 октябрь тонгида Россиянинг Владимир вилоятида автобус ва поезд тўқнашуви оқибатида жароҳатланган ўзбекистонликларни ва ҳалок бўлганларнинг жасадларини Ўзбекистонга олиб қайтадиган махсус самолёт Сурхондарё вилояти Термиз шаҳридаги аэропортга қўнади. Бу ҳақда «Кун» манбаси хабар берди.

Маълум бўлишича, йўл-транспорт ҳодисасига учраган автобусда бўлганларнинг аксар қисми Сурхондарё вилоятидан.

Бундан олдинроқ фожиадан омон қолган ўзбекистонликлар рўйхати маълум бўлганди.

Айни вақтда Ўзбекистон Ташқи ишлар вазирлиги фожиа оқибатида ҳалок бўлганларнинг шахсига аниқлик киритиш устида иш олиб бормоқда.

Эслатиб ўтамиз, 6 октябрь куни Россиянинг Владимир вилоятида автобус ва поезд тўқнашуви оқибатида автобусда бўлган 56 нафар ўзбекистонликдан 15 нафари ҳалок бўлган.

Ўзбекистонлик шифокорлар жароҳатланганларга ёрдам кўрсатиш учун Россияга учиб кетган.