4 октябрь куни Ўзбекистон Республикаси Олий Мажлиси Сенатининг 12-ялпи мажлиси бўлиб ўтгани ҳақида хабар берган эдик. Унда Ўзбекистон Бош вазири ўринбосари, «Ўзагротехсаноатхолдинг» бошқаруви раиси Нодир Отажонов ҳукуматнинг Ўзбекистонда етиштирилаётган пахталарни механизациялашган ҳолда йиғиб-териб олиш дастури ҳақида сенаторларга ахборот берди. 

“«Ўзагротехсаноатхолдинг» камида 40 мингта қишлоқ хўжалик техникаларини ишлаб чиқаришни режалаштирган. Шу мақсадда ходимларнинг малакасини оширишдан ташқари, соҳага олимлар ва академиклар жалб этилди. Холдинг ҳузурида конструкторлик бюроси ташкил этилиб, унги Жанубий Корея республикасининг 8 млн долларлик грант маблағлари жалб этилди. У шу йилнинг ноябрь ойидан тўлақонли ўз ишини бошлайди.

2018 йилда 3000 дона ишлаб чиқилиши белгиланган пахта териш машинасининг 600 таси экспортга мўлжалланган. Бундан ташқари, пахта етиштиришда хорижий ҳамкорлар билан кластерлар ташкил этилади. Мана, Президент Мирзиёевнинг АҚШга ташрифи чоғида дунёнинг етакчи компанияларидан бири ва Case New Holland компанияси билан ҳам шартномалар имзоланди. Келаси йили улар иштирокида Ўзбекистонда 300 та пахта териш машинаси ишлаб чиқилади”. 

Унинг қайд этишича, Case New Holland компанияси билан ҳамкорликда ишлаб чиқиладиган тракторларни пахта териш мавсумидан сўнг, горизонтал шпинделлардан ажратиб олган ҳолда қишлоқ хўжалик ишларига, хусусан, шудгорлаш, юк ташишда ҳам фойдаланиш мумкин бўлади.

Отажоновнинг айтишича, ҳозирда, бу борада Вазирлар Маҳкамаси томонидан пахтани машинада териш бўйича меъёрий ҳужжатлар, пахтанинг навига доир стандартлар ишлаб чиқилмоқда. Шунингдек, Вазирлар Маҳкамасининг яқин 5 йилда 14-15 минг пахта териш машинаси ишлаб чиқиш бўйича аниқ мақсадлии дастури йўлга қўйилмоқда.