АҚШ Давлат департаменти Саудия Арабистонига THAAD ракеталарга қарши комплексларини 15 миллиард доллар эвазига етказиб беришни маъқуллади. Бу ҳақда АҚШ Мудофаа вазирлигининг мудофаа ҳамкорлиги ва хавфсизлик Бошқармаси хабарномасида маълум қилинди.

Аниқлик киритилишича, Ар-Риёд Пентагондан 44 та учириш қурилмаси, 360 та THAAD Interceptor ракеталари, 16 та мобиль тактик бошқарув ва алоқа пунктлари, шунингдек, еттита AN/TPY-2 THAAD радари борасида мурожаат қилган. Бундан ташқари, юқоридаги маблағ ичига эҳтиёт қисмлари, учириш қурилмаларини олиб юриш учун 43 та юк машинаси, генераторлар, таъмирлаш ускуналари, йўриқномалар ва техник ҳужжатлар киради.

Шунингдек, бу пуллар учун ҳарбий мутахассислар ушбу ускунада ишлаш бўйича маҳаллий операторларни ўқитишлари керак бўлади. 

Пентагондан айтишларича, Саудия Арабистонига ушбу тизимларни сотиш минтақадаги куч мувозанатини ўзгартирмайди. Алоҳида таъкидланишича, Давлат департаментининг маъқуллаши сўнгги қадам эмас ва битим тузиш факти ҳақида гапириш имконини бермайди.