Брендлар билан ишлаш бўйича машҳур мутахассис Марсель Нобиль Аргентина, Португалия ва Уэльс терма жамоаларининг жаҳон чемпионатидан қолиб кетиши қандай оқибатларга олиб келиши ҳақида гапирди.

Унинг фикрига кўра, бунда ФИФА катта фойдадан қуруқ қолади.

"Футболда ҳам киносаноат қоидалари ишлайди. Маълумки, кинофильмга яхши даромад олиш мақсадида, машҳур киноактёрлар жалб қилинади.

Шу туфайли, ФИФА ташкилотининг хавотирга тушиши ўринли. Тадбирга қизиқишни орттириш учун юлдузларни жалб қилиш кераклигини инкор қилиб бўлмайди.

Катта номларнинг йўқлиги эса бренд учун катта йўқотишларни юзага келтиради. ФИФА юз миллионлаб евродан ажралиши мумкин", - деди Нобиль Mirror нашрига берган интервьюсида.

Эслатиб ўтамиз, айни пайтда Аргентина, Португалия ва Уэльс терма жамоалари ЖЧ-2018 йўлланмасини қўлга киритиш вазифасини бажармаган.