Ишонасизми, йўқми, ОКЕАНИЯ миллатлар кубоги деган турнир бор. Финал босқичида саккиз жамоа иштирок этади. Худди шу турнир финалида Папуя-Янги Гвинея терма жамоасини пенальтилар сериясида мағлуб этган Янги Зеландия терма жамоаси Океания чемпиони ҳисобланади. Саралаш  ўйинларида ҳам зеландияликлар ғолиб чиқишди ва энди плей-оффда Жанубий Америка вакилига қарши майдонга тушади. КОНМЕБОЛ минтақаси жамоаларининг кучли эканини эътиборга олсак, Океания чемпиони Россияга кела олмаслиги ҳақиқатга яқинроқ. 

ЛОТИН АМЕРИКАСИ чемпиони Чили терма жамоаси ҳисобланади. Чилиликлар сўнгги икки мусобақада Аргентина устидан пенальтилар сериясида ғалаба қозонишган. Аммо бу терма жамоа ҳам мундиалга бора олмай қолиш хавфи билан яшамоқда. Агар Чили сўнгги турда Бразилияда мағлубиятга учраса, ҳатто кучли бешликдан ҳам четда қолиши мумкин. 

Шимолий Америкаликлар ўз чемпионлариги «КОНКАКАФ Олтин кубоги»да аниқлайдилар. Охирги мусобақа шу йилнинг июль ойларида бўлиб ўтганди ва АҚШ терма жамоаси чемпионликни нишонлаган. Ҳозирда гуруҳда 3-ўринни эгаллаб турган америкаликлар ҳам ўзларини бемалол ҳис қила олишмайди. КОНКАКАФ саралаш гуруҳида 3 жамоа тўғридан-тўғри, яна бир жамоа Осиё вакили билан плей-офф ўйинлари орқали мундиалга бориш имкониятига эга. АҚШ 11 октбярь куни Тринидад ва Тобаго меҳмони бўлади ва агар мағлубиятга учраса, гуруҳда ҳатто бешинчи ўринга тушиб кетиши мумкин. Чунки АҚШни изма-из таъқиб қилиб келаётган Панама ва Ҳондурас терма жамоалари сўнгги турни йўлланмани нақд қилиб қўйган Мексика ва Коста-Рикани ўз майдонларида қабул қилишади. 

АФРИКА Миллатлар кубогининг сўнгги ғолиби Камерун терма жамоаси ҳисобланади. Шу йилнинг февралида Габонда бўлиб ўтган турнирда камерунликлар финалда Миср устидан устун келиб, бешинчи марта Африка чемпиони унвонига сазовор бўлишганди. Аммо яқинда Москвада бўлиб ўтган Конфедерациялар кубогида иштирок этиб кетган Камерун ЖЧ саралашида Нигерияга имкониятга бой берди ва ўз гуруҳида ғолиб бўла олмади. Камерун расман ЖЧ-2018га бориш ҳуқуқидан маҳрум бўлишга улгурди.

ОСИЁ чемпиони бизга яхши маълумки, Австралия терма жамоаси ҳисобланади. 2015 йилда ўз майдонида бўлиб ўтган мусобақада «кенгурулар» ғолиб бўлишганди. Энди эса, авлодлар алмашинувига дуч келган Австралия саралаш гуруҳида учинчи ўринни қўлга киритди ва Сурия билан плей-оффда қатнашмоқда. Сурияни ютиш ҳам уларга етарли бўлмайди, ҳали КОНКАКАФ вакилини ҳам мағлубиятга учратиш керак бўлади. Йўл ҳали узоқ. 

Евро-2004 да ғолиб бўлган Греция терма жамоаси икки йил ўтиб Германияда бўлиб ўтган мундиал йўлланмасини қўлга кирита олмаганда, кўпчилик у қадар ҳайрон бўлмаган. Чунки грекларнинг ЕВРОПА чемпионатида ғолиб чиқишларининг ўзи сенсация сифатида баҳоланганди. Қарангки, худди шундай тақдирга, 2004 йилдаги мусобақа мезбони Португалия ҳам дуч келиши мумкин. Роналду шериклари билан ўз майдонида Швейцария устидан ғалаба қозониши шарт бўлиб қолган. Агар бунинг уддасидан чиқа олишмаса, португалияликлар плей-оффда ўйнашларига тўғри келади. Плей-офф янада хавфлироқ. 

Қизиғ-а, саралаш босқичи тугашига атиги бир тур қолганида, ўнлаб жамоалар расман ЖЧ иштирокчиси бўлаётган бир паллада, ҳамма Конфедерациялардаги чемпионлар «зўрға туришибди». Ҳатто Россия-2018 бирорта ҳам чемпион қатнашмаган ўзига хос турнир сифатида тарихда қолиши ҳам мумкин. Бу нимадан далолат, ростан ҳам барқарор даражада кучли бўлиб тура олиш қийинлашиб кетмоқдами ёки юлдузларда қанақадир ўзгаришлар бўлиб, комета урилиб, сўнгги қитъа чемпионатлари тасодифларга тўлиб кетдими, билмадик. Шунчаки, фактларга кўз югуртирдик.  

Қаҳрамон Асланов