Tramp AQSh yadro arsenalini 10 barobar oshirmoqchi

AQSh prezidenti Donald Tramp 20 iyul kuni milliy xavfsizlik tizimining yuqori lavozimli vakillari bilan uchrashgan va yadro arsenalini 10 barobar oshirish niyati borligini aytgan.

Bu haqda yig‘ilishda ishtirok etgan manbasiga tayanib, NBC News kanali xabar bermoqda, deb yozadi Intrefax.

Manbaning gapiga ko‘ra, Tramp AQSh yadro quroli miqdorining kamayishi aks ettirilgan jadvalga izoh bera turib, shunday bayonot bergan.

Prezidentning bu gaplari AQSh shtablari rahbarlari qo‘mitasi vakillari va AQSh davlat kotibi Reks Tillersonni hayron qoldirgan.

Yig‘ilishda ishtirok etgan mulozimlar yadro arsenali miqdorini ko‘paytirish natijasida yuzaga keladigan huquqiy va amaliy qiyinchiliklar haqida prezidentga tushuntirish bergan. Shuningdek, ayni paytda AQSh o‘tgan davrga nisbatan eng kuchli harbiy qudratga egaligini bayon qilishgan.

NBC News manbasining ta'kidlashicha, bu uchrashuvdan so‘ng, ma'muriyatning ba'zi vakillari davlat kotibi Tillerson Trampni go‘yo "tentak" deb aytganini eshitishgan.

Avvalroq, NBC News davlat kotibi tomonidan prezident sha'niga aytilgan bu haqorat haqida xabar bergan edi. Bunga javoban, Tramp bu xabarni qalbaki ekanini aytdi va Forbes jurnaliga bergan intervyusida uning aqliy koeffitsiyenti (IQ) Tillersonnikidan baland ekanini ta'kidladi.

Keyinchalik Tramp bu bayonotini AQSh tashqi siyosiy idorasi rahbariga qaratilmaganini aytdi.

"Men hech kimga ta'na qilmadim. Bunday dashnomlarga ishonmayman", - dedi Tramp jurnalistning bu haqdagi savoliga javoban.

O‘z navbatida, Oq uy Trampning bayonoti hazil ekanini ma'lum qildi.