17:32 / 14.10.2017
12575

Mirziyoyevga «Xavfsiz turizm» loyihasi taqdim etildi

Foto: KUN.UZ

Turizm mamlakat iqtisodiyotini rivojlantirish, yangi ish o‘rinlari yaratishda muhim yo‘nalishlardan hisoblanadi. Bugun mamlakatimizning barcha hududlarida sayyohlik sohasida istiqbolli loyihalar amalga oshirilmoqda. Davlat rahbarining 2016 yil 2 dekabrdagi “O‘zbekiston Respublikasining turizm sohasini jadal rivojlantirishni ta'minlash chora-tadbirlari to‘g‘risida”gi farmoni bu borada muhim omil bo‘lmoqda, deb yozadi O‘zA.

Prezident joriy yilning yanvar oyida Xorazm viloyatiga tashrifi davomida viloyatning turizm borasidagi imkoniyatlarini to‘liq ishga solish, yangi yo‘nalishlar tashkil etish va ularni jahon bozorlarida targ‘ib qilish, mehmonxonalar va transport infratuzilmasini rivojlantirish zarurligini alohida ta'kidlagan edi. 

Turizm sohasida faoliyat yuritayotgan tadbirkorlar bilan suhbatda tarmoqda xalqaro hamkorlikni kengaytirish orqali xorijlik sayyohlarni ko‘proq jalb qilish, xizmat ko‘rsatish sifatini yuksaltirish, soha uchun yetuk mutaxassislar tayyorlash va ularning malakasini oshirish, suvenir ishlab chiqaradigan korxonalarni ko‘paytirish bo‘yicha mutasaddilarga tegishli topshiriqlar bergan edi. 

Shavkat Mirziyoyevga ushbu topshiriqlarning ijrosi bo‘yicha ma'lumotlar berildi viloyatga xorijlik va mahalliy sayyohlarni jalb qilish, hududning turizm salohiyatini yanada rivojlantirish loyihalari taqdim qilindi. 

Yangi sayyohlik yo‘nalishlarini ochish, yangi mahsulotlar ishlab chiqarish bo‘yicha qilinayotgan ishlar, 2018 yilda kelishi kutilayotgan sayyohlar oqimi haqida ma'lumotlar berildi. 

Turizm rivojlangan mamlakatlarda «xavfsiz turizm» atamasi qo‘llanilmoqda. «Xavfsiz turizm» loyihasi O‘zbekistonga kelgan sayyohlar va mehmonlarning xavfsizligini taminlash, ular uchun zamonaviy sharoitlar yaratish chora-tadbirlarini ko‘zda tutadi. 

Prezident viloyatda «Xavfsiz turizm» konsepsiyasini amalga oshirish loyihasi bilan ham tanishdi. Unda turizm infratuzilma obektlarini videokuzatuv moslamalari bilan jihozlash, turizm sohasida xizmat ko‘rsatuvchi va sayyohatchilarning xavfsizligini ta'minlovchi davlat va nodavlat obektlarini yagona axborot-kommunikatsiya tizimiga ulash, viloyat hududiga tashrif buyuruvchi sayyohlar bo‘yicha ma'lumotlar ba'zasini shakllantirish kabi chora-tadbirlar o‘rin olgan. 

Top