Chorvadorlar va baliqchilar ozuqa-yem uchun davlat g‘allasini endi birja orqali xarid qilishadi

O‘zbekiston Respublikasi Vazirlar Mahkamasining 2017 yil 18 oktabrdagi «Chorvachilik va baliqchilik ozuqa-yem bazasini mustahkamlash chora-tadbirlari to‘g‘risida»gi 845-sonli qarori qabul qilindi.

Qaror matnida dastlabki hisob-kitoblarga ko‘ra, ayni paytda respublikamizda 6 mingdan ziyod chorvachilik va 3 mingdan ziyod baliqchilik xo‘jaliklari faoliyat ko‘rsatayotgani keltirilgan. Joriy yil yakunlariga ko‘ra 2.319 ming tonna go‘sht va sun'iy havzalarda 60 ming tonna baliq yetishtirish kutilmoqda.

Qarorga asosan o‘rnatilayotgan tartibga ko‘ra, chorvachilik va baliqchilik yo‘nalishidagi tadbirkorlik sub'yektlariga 2017 yil hosilidan boshlab g‘alla sotuvi yem-ozuqa maqsadlarida davlat resurslaridan ajratiladigan «O‘zbekiston respublika tovar xomashyo birjasi» AJ birja savdolari orqali realizatsiya qilinadi.

Shuningdek, chorvachilik va baliqchilik yo‘nalishidagi tadbirkorlik sub'yektlariga davlat resurslaridan ozuqa-yem maqsadlarida ajratiladigan g‘allaning realizatsiya qilinishi haqidagi nizom; 2017 yilning II yarim yilligi va 2018 yilning I yarim yilligi uchun davlat resurslaridan ajratiladigan g‘allaning kvotasi hajmi tasdiqlangan.