Шу йилнинг 2-3 ноябрь кунларида Тошкент шаҳрида ўтказилиши режаштирилган МДҲ аъзо давлатлар ҳукумат раислари Кенгашининг навбатдаги йиғилишида иштирок этиш учун Ўзбекистонга келган Қирғизистон Республикаси Бош вазири Сапар Исақов бугун Мирзо Улуғбек номидаги Ўзбекистон Миллий университетига ташриф буюрди. 

Қирғизистонлик меҳмонлар ЎзМУда ташкил этилган «Чингиз Айтматов ва Ўзбекистон» доимий экспозицияси билан танишишди. 

Ўзбекистон Республикаси Олий ва ўрта махсус таълим вазири Иномжон Мажидов, ЎзМУ ректори Авазжон Мараҳимов, адабиётшунос Аҳмаджон Мелибоев ва бошқалар атоқли қирғиз адиби Чингиз Айтматов аллақачон миллионлаб ўзбек китобхонлари қалбидан муносиб жой олгани ҳақида сўз юритишар экан, президент Шавкат Мирзиёевнинг шу йил 5-6 сентябрь кунлари Қирғизистонга давлат ташрифини амалга оширган чоғида улуғ ёзувчи Чингиз Айтматовнинг ўзбек ва қирғиз халқлари ҳақида «Халқларимизнинг қони бир, тили бир» деган ҳикматли сўзларини мисол қилиб келтиргани барчада катта қизиқиш уйғотганини алоҳида таъкидлашди. 

Экспозиция меҳмонларда катта қизиқиш уйғотди. 

Улар атоқли адиб Чингиз Айтматовнинг яқинда чоп этилган тўла асарлар тўпламларини туҳфа этишди.