Оқ уй расмийлари ва Осиё давлатлари етакчилари Шимолий Корея Дональд Трампнинг Осиёга турнесини ўзига хос тарзда қаршилашидан, бу давлат навбатдаги ракета синовлари ўтказишидан хавфсирашмоқда. Бу ҳақда Politico нашри хабар тарқатди.

«Ким Чен Ин Дональд Трамп Шарқий Осиёда эканида баллистик ракеталар ёки ҳатто ядровий қурилмалар синовини ўтказиши мумкин. КХДР бундай ҳаракати орқали эскалация ҳолатини янада чуқурлаштириши мумкин», — дея ёзган нашр.

Ёнҳап агентлиги эса жанубий кореялик разведкачилар КХДРнинг ракета объектларида фаолликни қайд этишган, одатда бундай ҳаракатлар ракета синовлари арафасида кузатилади.

Шу билан биргаликда, экспертлар Оқ уй воқеаларнинг бундай ривожига тайёр эканига ишонч билдиришмоқда. Улар шимолликлар бу вақтда ракета синови учириш орқали АҚШ ва иттифоқчиларининг Ким Чен Ин режимига қарши янада жипслашувига сабаб бўлишини айтишмоқда.