Germaniyaning Süddeutsche Zeitung gazetasi Bermud orollarining Appleby ofshor huquqiy firmasiga tegishli bo‘lgan bir qancha maxfiy moliyaviy hujjatlarni qo‘lga kiritdi.
BBC xabariga ko‘ra, ulardagi ma'lumotlardan Alisher Usmonov va Farhod Moshiriy tomonidan amalga oshirilgan «Arsenal» va «Everton» aksiyalari bilan bog‘liq ba'zi ishlarning tafsilotlari oydinlashdi.
2007 yilda hamkorlarga tegishli bo‘lgan Red and White Holdings ofshor kompaniyasi «Arsenal»ning 14,58% aksiyasini xarid qilgan. Rasmiy xabarlarda, Usmonov va Moshiriyning Red and White Holdings kompaniyasidagi ulushi 50%dan ekani aytilgandi. Ammo, hujjatlarga ko‘ra, «Arsenal» aksiyalarining xaridini to‘lig‘icha Usmonov moliyalashtirgan. Moshiriy esa pullarni sovg‘a tariqasida olgan.
2016 yilda Red and White Holdings «Arsenal» aksiyalarining 30,4%ga ega bo‘ldi. Moshiriy esa Red and White Holdings kompaniyasidagi 50% ulushini Usmonovga sotganini e'lon qildi. Shundan so‘ng, «Everton»ning 49,9% aksiyasini sotib oldi. Ya'ni, Usmonovning pullari «Everton»ni xarid qilish uchun sarflandi. Bundan xulosa qilish mumkinki, rossiyalik tadbirkor ikkita klubning aksiyalariga egalik qilmoqda.
APL qoidalariga ko‘ra, liganing biror klubiga tegishli bo‘lgan 10% aksiyani sotib olgan shaxs, boshqa klublarning aksiyasiga egalik qilolmaydi. Ehtimol, Usmonov va Moshiriy bu qoidani buzgan bo‘lishi mumkin.
Moshiriyning advokatlari tadbirkorning 2007 yili Red and White Holdings kompaniyasidagi ulushini sotib olish uchun Usmonovdan pul olganini inkor etmoqda.
