«Manchester» - «London» - 1:1. APLda tur yakunlari

Angliyada shiddatli bahslarga boy kechgan yana bir tur yakunlandi. 11 turda muxlislar birdaniga ikkita katta o‘yinga guvoh bo‘lishdi. Avvaliga «Manchester Siti» Londonning «Arsenal» jamoasini qabul qilib, g‘alabaga erishgan bo‘lsa, Manchesterning boshqa jamoasi Londonda «Chelsi» mehmoni bo‘lib mag‘lubiyatga uchradi. «Tribuna» turning asosiy voqealariga nazar tashlaydi.

VeNGeR HAKAMLARDAN NOROZI

«Men ko‘rgan voqealarni siz ham ko‘rdingiz. Ofsaydlardan urilgan gollar shousi. Men raqibning saviyasiga shubha qilmayman, ammo o‘sha noto‘g‘ri gol biz endiina hisobni qisqartirib, o‘yinda burilish yasashga urinayotgan pallamizda urildi. O‘tgan mavsumda ham biz bu stadionda ofsayddan ikki gol o‘tkazib yuborgandik» – dedi «Arsenal» murabbiyi Arsen Venger. Murabbiy shuningdek, jamoasi darvozasiga belgilangan penalti ham nohaq bo‘lganini ta'kidladi.

Vengerni tushunsa bo‘ladi, rostan ham Jyezus tomonidan gol urilgan vaziyatda unga to‘pni uzatgan David Silva yaqqol ofsaydda qolgan edi. Hatto «Arsenal»ning ba'zi himoyachilari to‘p uchun kurashdan ham chiqib ketgandi. Bu vaziyat esa, aynan Lyakazet hisobni qisqartirgan, Venger hujumga e'tibor qaratib, Jiru va Uilshirni maydonga tushirishga tayyorlanayotgan pallada ro‘y berdi. Aynan shu uchinchi gol o‘yinga nuqta qo‘ydi, deb aytish mumkin.

Penaltining bahsli bo‘lgani haqida ham fikrlar ko‘p yangradi. Ammo tan olish kerak, mezbonlar «Arsenal»ga nisbatan ancha kuchli o‘yin namoyish qilishdi va o‘sha vaziyatlarsiz ham kerak bo‘lganda gol ura olishlari sezilib turgandi. Bundan tashqari, birinchi bo‘limdagi bir vaziyatga e'tibor qaratish mumkin – «Arsenal» himoyachilari to‘pni ochiq darvozaga kiritish imkoniyatiga ega bo‘lgan Sterlingga qarshi biroz qo‘pol harakat qilishgan, ammo hakam bu vaziyatni e'tibordan chetda qoldirgandi.

MUXLISLAR SANCheSDAN NOROZI

Arsen Venger hakamlardan tashqari o‘z futbolchisidan ham norozi bo‘lgani tabiiy. Lyakazet, Jiru kabi futbolchilar zaxirada qoldirilib, hujum chizig‘i Aleksis Sanchesning faolliga ishonib topshirilgandi. Ammo muxlislarning tanqidlarida jon bor – aynan faollik bobida chililik hujumchi ko‘pchilikning hafsalasini pir qildi.

Sanches o‘yin davomida atigi 9.6 km yugurdi, bu londonliklar darvozaboni Piter Chexnikidan atigi 4.8 km ko‘p xolos. U bu ko‘rsatkich bo‘yicha o‘sha kuni maydonda harakat qilgan futbolchilar ichida eng past natijani qayd etdi. Hatto doimo dangasalikda va kam yugurishda ayblanadigan Mesut O‘zil Sanchesdan salkam 1.6 km ko‘p yugurgan. Aaron Remzi esa, jamoadoshidan salkam 3 kilometr ko‘proq yugurgani ma'lum bo‘ldi.

«CheLSI»NI G‘OLIB QILGAN 3 JIHAT

Kantening qaytishi

Bir oylik tanaffusdan so‘ng, fransiyalik yarim himoyachi yana maydonga qaytdi. Aynan uning safda bo‘lishi uchrashuvning eng yaxshilari qatorida tilga olingan Sesk Fabregas va Temue Bakoyokoning erkinroq harakat qilishlariga zamin yaratdi. Bu futbolchilarning hujum chizig‘ida faol bo‘lishlari oqibatida, asosan Azarni qo‘riqlash bilan shug‘ullangan «MYu» himoyasida muvozanat buzilishini ta'minladi. Buning natijasida bu ikki yarim himoyachi birgalikda juda ko‘p xavfli vaziyatlar yaratishdi.

Errera har doim Errera emas

Ispaniyalik yarim himoyachining katta o‘yinlarda raqibning asosiy futbolchisi bilan personal o‘ynashini yaxshi bilamiz va ko‘pincha bu taktika ish bergan. Jumladan, jamoalarning aprelda «Old Trafford»dagi o‘yinini eslash mumkin. Shu bilan birga, Angliya kubogi chorak finalida Azarning qo‘li baland kelgan va Ander birinchi bo‘limdayoq qizil kartochka olgandi. Ushbu mavsumda ham Errera Koutino, Eriksen kabi raqib yetakchilarini o‘yindan chiqarishning uddasidan chiqdi. Ammo bu safar uning kuni bo‘lmadi. Yuqorida aytilganidek, Sesk va Bakoyokoning ham hujumda faolligi evaziga, Errera ko‘p vaziyatlarda o‘z vazifasini uddalay olmadi. 

Mxitaryan yo‘qolib qoldi

Genrix mavsumni juda yaxshi boshlab, dastlabki 3 turda besh golli uzatmani amalga oshirganda, «MYu»ning «o‘nligi» haqida savollar kamida bir-ikki yilga yopilganini ko‘pchilik taxmin qilgani ehtimol. Ammo keyingi o‘yinlarda armanistonlik yarim himoyachining ishi yurishmayapti. Keyingi 8 o‘yinda faqat 1 gol muallifi bo‘ldi xolos. Xususan «Stemford»dagi o‘yinda ham futbolchi butunlay yo‘qolib qoldi va murabbiy tomonidan 61-daqiqadayoq almashtirib yuborildi. Nazarimizda, Pogbaning qaytishi bu masalaga uzil-kesil nuqta qo‘ysa kerak: Yoki Mxitaryan o‘rnini butunlay Pogbaga bo‘shatib beradi yoki Pogbaning yonida futbolchi eski sport formasiga qaytadi. Axir, aynan Pogbaning jarohatidan so‘ng, Mxitaryan o‘yinida pasayish boshlanganiga e'tibor qaratish kerak. 

TOP MURABBIY

Joze Mourinoning katta o‘yinlar uchun juda yaxshi tayyorgarlik ko‘ra olishi haqida juda ko‘p «rivoyatlar» aytiladi. Ammo agar so‘nggi yillarga e'tibor qaratsak, bu holat butunlay teskari ko‘rinish olayotganini kuzatish mumkin.  Ayniqsa, safar o‘yinlarga portugaliyalik mutaxassis o‘ta pragmatik yondashmoqda va 0:0 hisobiga harakat qilayotganini sezdirib qo‘ymoqda.

«Manchester Yunayted»ni boshqargandan beri Mourino safarda 8 (7ta APLda va 1 kubok o‘yini) marta mana shunday top uchrashuv o‘tkazdi. Natijalarga e'tibor bering: 0:0, 0:4, 0:1, 0:0, 0:2, 1:2, 0:0, 0:1. Ya'ni «MYu» safardagi top o‘yinlarda atigi 1 gol urdi, u ham bo‘lsa, «Tottenhem» maydonida, hisob 0:2 bo‘lib turgan paytda kiritilgan keraksiz gol edi xolos. Jurnalistlar murabbiyning «Chelsi»dagi so‘nggi safar o‘yinlariga ham e'tibor qaratdilar. U yerda ham ahvol chatoq – so‘nggi uch o‘yinda gol urilmagan.

Esingizda bo‘lsa, 2015 yilning yanvarida, o‘sha paytda turnir jadvalini boshqarib turgan Mourino qo‘l ostidagi «Chelsi» «Tottenhem»ga safar qilgandi. Har ikki jamoa himoyani unutib, juda hujumkor o‘yin ko‘rsatishgan va yakunda mezbonlar 5:3 hisobida zafar quchgandi. O‘sha o‘yin Mourinoga dars bo‘lib qolgandir balki, shundan buyon uning jamoalari top jamoalarga qarshi safarlarga gol urishni o‘ylamay tashrif buyura boshlagan. 11 o‘yinda 6 mag‘lubiyat, 5 durang va atigi 1 gol urilgan.   

PRIMeRA LIGA

De Xea – Aspilikuyeta, Monreal, Alonso, Ballerin – Errera, Fabregas, Silva – Mata, Pedro, Morata.

Bu yakshanba kuni APLda o‘zaro kuch sinashgan top-jamoalardagi ispan futbolchilaridan tuzilgan ramziy tarkibdir. Bular ichida Pedro va Mata maydonga tushmadi, ammo ularning ham o‘z jamoalarida deyarli asosiy tarkib o‘yinchilari ekanini e'tiborga olsak, juda ko‘pdir.

Inglizlardan iborat shunday tarkib tuzishga urindik, ammo bunday futbolchilar soni bir tarkibga yetmadi. Shu tariqa dunyoning eng qimmat va kuchli ligasi Ispaniya terma jamoasi uchun nomzodlar yetishtirishda ham muhim ahamiyat kasb etayotganini e'tirof etish mumkin. Zero, bundan o‘n besh yillar oldin Angliyada ispan futbolchisini tasavvur qilish ham qiyin edi. 

UOTFORD PLYuS

«Uotford»ning o‘yinlarini kuzatib yurgan muxlis uchun Liverpuldagi triller odatiy holdek ko‘rinishi turgan gap. Markus Silva shogirdlari bungacha 4 o‘yinda oxirgi daqiqalardagi gollar hisobiga ochko olishga (ikki durang, ikki g‘alaba) muvaffaq bo‘lishgandi.

Bu safar esa, 2 to‘p farqi bilan hisobda oldinga chiqib olgan «Uotford» yakunda mag‘lubiyatga uchradi. Hal qiluvchi so‘nggi gol esa, Beynsning penaltidan bergan zarbasidan so‘ng amalga oshdi. Shu holatda ham, mehmonlar jamoasi so‘nggi daqiqalar aynan «Uotford»ga tegishli ekanini ko‘rsatib qo‘yish imkoniyatiga ega bo‘lgandilar. Ammo 90+4 daqiqada belgilangan penaltini Tom Kleverli amalga oshira olmadi. Ha, o‘sha, «Arsenal» darvozasiga so‘nggi daqiqalarda g‘alaba golini urgan, o‘sha o‘tgan yilni «Everton» tarkibida o‘tkazgan Tom Kleverli...

«BYoRNLI» O‘T QO‘YIShDA DAVOM ETMOQDA

«Byorn» inglizchada «yoqmoq», «o‘t qo‘ymoq» ma'nolarini anglatadi. Shon Daych jamoasining ushbu mavsumdagi ishtiroki bu nom bekorga tanlanmaganini isbotlayotgandek go‘yo.

Shanba kuni o‘tkazilgan 5 o‘yinning 4tasida mehmonlarning qo‘li baland keldi. Ayniqsa, «Byornli»ning navbatdagi g‘alabasiga alohida e'tibor qaratish lozim. Jamoa bu yil safarda qo‘lga kiritgan ochkolari sonini 11taga yetkazdi. APLda faqat «Manchester Siti», «Tottenhem» va «Chelsi» klublari safarda yaxshiroq o‘ynashgan xolos.

TUR IQTIBOSI:

«Biz so‘nggi transfer darichasida Gulfi Sigurdssonni yo‘qotdik, aytishim mumkinki, u bizning eng yaxshi o‘yinchimiz edi. Fernando Lorente «taqachi»lar safiga qo‘shildi. Biz esa, bu ikki futbolchining o‘rniga ikki yildan beri futbol o‘ynamayotgan Uilfrid Boni oldik. Yana qanaqa natija kutish mumkin?»

(Radio 5 dagi futbol dasturiga telefon qilgan 10 yoshli “Suonsi” muxlisi)

Turnir jadvali