«Трибуна» Испания чемпионатининг навбатдаги тури якунларини сарҳисоб қилади.

Роналду ва Бензема Мадрид дербисига куч сақламоқдами?

 

«Реал» бу турда «Лас Пальмас»ни осонлик билан мағлуб этди. Аммо бу ўйинда ҳам «Сантьяго Бернабеу»да йиғилганлар мадридликлар жамоаси ҳужумчиларининг голларини кўришмади. Бензема икки марта яққол голли вазиятни ўз одати бўйича кўкка совуриб, ҳуштакбозликларни қабул қилиб олди, Роналду эса яна бир неча марта рақиб дарвозаси тўсини мустаҳкамлигини текшириб кўрди, аммо у якунда ўйин қайдномасига ўз номини ёздириб қўйди. У учинчи голда Искога ассистентлик қилди. Бу паси орқали Роналду жамоа тарихидаги энг яхши ассистентлар рўйхатида Рауль Гонсалесни ортда қолдирди (84та пас). Аммо юлдузли дуэтнинг «оч ўйинлари» давом этади - Роналду ва Бензема жуфтлиги 11 турдан кейин атиги 2та гол урган. Бир ҳафтадан кейин «Атлетико»га қарши Мадрид дербиси. Балки, футболчилар ўша ўйинда «очлик»ни тўхтатишар?

Бу ўйинда мезбонларнинг 20 ёшли ҳимоячиси Хесус Вальхео яхши таассурот қолдирди.

Рафаэль Вараннинг жароҳат олиши ушбу футболчига ўзини кўрсатишга имкон берганди. Зидан Ашрафни ўйин қайдномасига киритмади ва Вальхео асосий таркибда, Испания чемпионатида дебют қилди. Унинг «Реал» таркибидаги расмий дебюти Испания Кубогида, «Фуэнлабрада»га қарши ўйинда рўй берган, ўшанда ҳам у ўзини яхши томондан кўрсатганди. Ла Лигадаги дебют ўзига хос бўлди, 35 йил ичида илк марта клуб академияси тарбияланувчиси бўлмаган ёш футболчи дебют қилди. Вальхео 2 йил олдин «Сарагоса»дан сотиб олинганди, у биринчи мавсумни ижара асосида ўтказган, ўтган мавсумда эса «Айнтрахт» клубида тўп сурган. Бундай ҳолат охирги марта 1982-83 йилги мавсумда Пако Бонета билан рўй берган, бу футболчи Мадридга «Эльче»дан келганди.

Мессида 600

Турнинг марказий учрашуви шанба оқшомида, «Камп Ноу»да «Барселона» ва «Севилья» ўртасида кечди. Каталонияликлар етакчиси Лионель Месси учун бу юбилей учрашув эди, у 600-марта ушбу жамоа сафида майдонга тушди. У бу ўйинларда 523та гол урган ва 30та совринни қўлга киритган, анча вақтгача ҳеч ким такрорлай олмайдиган рекордларни ўрнатган.

Андалусияликлар жамоаси аргентиналик бу футболчининг севимли клуби ҳисобланади - у Испанияда энг кўп голини шу жамоа дарвозасига йўллаган (29та). Бу борада иккинчи ўринда «Атлетико» (27), учинчи ва тўртинчи ўринларда «Реал» ҳамда «Валенсия» жамоалари (24). У бу жамоага юбилей учрашувида юбилей - 30-голини уриши кутилганди. Аммо бу сафар ҳам у юбилей учрашувни голсиз ўтказди. Бунгача у №100, №200, №300 ва №400 ўйинларда гол ура олмаган. 500-учрашувда бу анъанага барҳам берган эди, 600-учрашувда эса давом этди.

Шанба кунги ўйин қаҳрамони Пако Алькасер бўлди.

Унинг икки голи жамоага муҳим ғалаба келтирди.

No Thomas - No Partey

«Атлетико» «Валенсия» ва «Барселона» каби бу мавсумда ҳали мағлубият билмади. Аммо Мадрид жамоасига дуранглар вируси юққан - Симеоне шогирдлари охирги 7 учрашувдан 6тасида дуранг қайд этганди. Жамоанинг охирги ғалабаси октябрь ойи бошида Вигода, «Сельта»га қарши ўйинда кузатилганди. 

«Атлетико» мухлислари No Thomas - No Partey ёзуви туширилган футболкаларни чиқаришса ҳам бўлади. Бундай ибора Андрей Пирло билан боғлиқ. Дастлаб «No Pirlo – No Party» ибораси (Пирлосиз ҳеч қандай зиёфат йўқ) пайдо бўлганди.

Иккинчи учрашувдирки, «матрасчилар»нинг ганалик ярим ҳимоячиси Томас Партей жамоа учун муҳим голни урмоқда. Ҳафта аввалида у жамоани ЕЧЛ доирасида «Қорабоғ»га қарши ўйинда кучли зарбаси билан мағлубиятдан қутқариб қолганди.

Шанба куни «Депортиво»га қарши ўйинда эса у қўшимча дақиқаларда гол уриб, ғалаба келтирди.

Симеоне жамоаси Ла Лигада «Депортиво»га ҳеч қачон ютқазмаган.

«Атлетико»нинг асосий юлдузи Антуан Гризманн эса ҳозирча сукут сақламоқда. У қаторасига саккизинчи учрашувдирки майдонни голсиз тарк этмоқда. Бу унинг шахсий антирекорди. Олдинда эса Мадрид дербиси.

Дзадза тўхтади

«Валенсия»нинг жорий мавсумдаги энг яхши тўпурари Симоне Дзадза «Леганес»га қарши 3:0 ҳисобидаги ғалаба билан якунланган ўйинда гол ура олмади. У бунгача қаторасига 6 ўйинда гол урган ва рекорд ўрнатиш арафасида турганди. Аммо валенсияликлар мураббийи Марселино уни 78-дақиқада майдондан олди. Италиялик футболчи эса бунга намойишкорона норозилик билдирди. У мураббийга қўл беришдан бош тортди ва ўйин тугамасидан захира ўриндиғини тарк этди.

«Кўршапалаклар» жамоаси учун бу ўйиндаги ғалаба мавсумда қаторасига еттинчи ғалаба бўлди, бу эса клуб тарихида илк марта кузатилди.

Виториядаги мўъжиза

Ўтган турда «Малага» билан бўлгани каби, бу турда «Алавес» ҳам мавсумдаги илк ғалабасига эришди. Жамоа бунгача мавсумдаги 5та уй учрашувида умумий ҳисобда 2:11 ҳисобида мағлуб бўлганди. Бу сафарги рақиб «Эспаньол» чемпионат доирасидаги охирги 8 учрашувда фақат бир марта мағлуб бўлганди. Аммо Виторияда мўъжиза рўй берди, Кристиан Сантоснинг ягона голи «Алавес»га мавсумдаги илк ғалабани келтирди. Қолаверса, бу гол мавсумдаги энг тезкор гол бўлди (45-сонияда).

Тур натижалари

«Бетис» – «Хетафе» – 2:2 (0:2)
Голлар: Бергара, 18 (0:1). Портильо, 34 (0:2). Санабрия, 68 (1:2). Будебуз, 87 (2:2).
«Валенсия» – «Леганес» – 3:0 (1:0)
Голлар: Парехо, 14 (1:0). Родриго, 71 (2:0). Мина, 82 – пенальти (3:0).
«Депортиво» – «Атлетико» – 0:1 (0:0)
Гол: Партей, 90+1 (0:1).
«Алавес» – «Эспаньол» – 1:0 (1:0)
Гол: Сантос, 1 (1:0)
Четлатиш: Эрмосо (Эспаньол), 39.
«Барселона» – «Севилья» – 2:1 (1:0)
Голлар: Пако Алькасер, 23 (1:0). Писарро, 59 (1:1). Пако Алькасер, 65 (2:1).
«Леванте» – «Жирона» – 1:2 (0:0)
Голлар: Борха, 58 (0:1). Стуани, 83 (0:2). Энес Унал, 90+2 (1:2).
«Сельта» – «Атлетик» – 3:1 (3:1)
Голлар: С.Гомес, 16 (1:0). Аспас, 22 (2:0). Аспас, 26 (3:0). Рауль Гарсия, 38 (3:1).
«Реал Сосьедад» – «Эйбар» – 3:1 (2:0)
Голлар: Виллиан Жозе, 12 (1:0). Янузай, 28 (2:0). Ойярсабаль, 46 (3:0). Хоан Хордан, 72 (3:1).
«Вильярреал» – «Малага» – 2:0 (0:0)
Голлар: Сансоне, 68 (1:0). Сансоне, 76 (2:0).
«Реал» – «Лас-Пальмас» – 3:0 (1:0)
Голлар: Каземиру, 41 (1:0). Асенсио, 56 (2:0). Иско, 74 (3:0).

Турнир жадвали