OAV: Trampning sobiq maslahatchisiga Gulenning ekstraditsiyasi uchun 15 mln dollar taklif qilingan

The Wall Street Journal nashrining yozishicha, Turkiya AQSh prezidenti Donald Trampning milliy xavfsizlik bo‘yicha sobiq maslahatchisi  Maykl Flinn va uning o‘g‘li Kichik Maykl Flinnga turk muxolifatchisi Fathulla Gulenning ekstraditsiya qilinishidagi yordam uchun 15 mln dollar taklif qilgan. 

Nashrning manbalari ma'lumotlariga ko‘ra, Flinn va Anqara vakillari 2016 yil dekabrda Manxettendagi “21” nomli restoranda uchrashishgan. Bu uchrashuv vaqtida Gulenning Turkiyaga topshirilishi masalasi muhokama qilingan. Flinn bu vaqtda hali Oq uyda ishlamagan.  

FQB ushbu uchrashuv bo‘yicha 4 kishini so‘roq qilgan. Manbalardan birining ma'lum qilishicha, tomonlar Gulenning shaxsiy samolyotda Imrali oroliga kuch bilan yetkazilishi imkoniyatini muhokama qilishgan. Biroq nashrga bu ma'lumotni bergan manbalar ushbu uchrashuvda shaxsan ishtirok etishmagan va bu haqda Flinn yoki uning yordamchilaridan biror ma'lumotga ega bo‘lishmagan. 

Nashrning ma'lum qilishicha, ayni vaqtda FQB ushbu ishning tergovini Rossiyaning AQShdagi saylovlarga ehtimoliy aralashuvini tergov qilayotgan maxsus prokuror Robert Myullerga topshirgan. Shuningdek, Flinn biror pul olgani-olmaganining isboti yo‘q. 

Yana bir manbaning ma'lum qilishicha, Flinn Trampning maslahatchisi bo‘lib ishlagan kezlarda o‘zining Oq uydagi mavqeidan foydalanib, Gulenning Turkiyaga qonuniy asoslarda topshirilishiga erishmoqchi bo‘lgan.

Flinn va uning o‘g‘lining advokatlari nashrga izoh berishdan bosh tortishgan.

Nashrning eslatishicha, Flinn Trampning ma'muriyatida ishlashidan oldin Turkiyaning AQShdagi manfaatlarini qo‘llab-quvvatlab kelgan. 

Gulen Turkiya prezidenti Rajab Toyyib Erdo‘g‘anning siyosiy raqibi hisoblanadi va oxirgi yillarda AQShda yashab keladi. Turkiya hukumati Gulenni o‘tgan  yil Turkiyada amalga oshirilgan davlat to‘ntaruviga urinish tashkilotchisi deb hisoblaydi.