Жорий йилнинг 1 декабридан бошлаб, Ўзбекистон бўйлаб хорижга пул ўтказмалари миллий сўм валютасида қабул қилиниб, амалиёт ўтказилаётган кунда Марказий банк белгилаган қиймат бўйча конвертация қилинган ҳолда юборилиши маълум бўлди. Бу ҳақда Марказий Банк раиси биринчи ўринбосари Тимур Ишметовга асосланиб Kun.uz мухбири хабар беради.

Ўзбекистондан ташқарида истиқомат қилаётган талаба, бемор ёки иш сафарида бўлган яқинлари учун банк мижозлари эндиликда пул ўтказмасини миллий валютада топшириши мумкин. Жараён жуда содда тартибда амалга оширилиб, пул ўтказмаси амалга ошириладиган кунда Марказий банк томонидан белгилан курс бўйича маблағлар хорижий валютага конвертация қилинади.

«Биз ушбу амалиётни келаси ойда тўлиқ ишга туширишга тайёрмиз. Аҳоли бу имкониятдан фойдаланиши билан ортиқча вақт ва ресурс сарфлаб ўтирмай, чет элдаги таниши ёки қариндошига пул ўтказмасини хорижий валютада етказиб бериши мумкин», дейди раиснинг биринчи ўринбосари.

Айни вақтда банк мижозлари хорижий валютани нақдсиз кўринишда харид қилиши, ҳар қандай кўринишда сотиши мумкин. Бундан аввалроқ Марказий банк вакиллари нега ислоҳотлар бошида айнан хорижий валютанинг нақдсиз сотуви йўлга қўйилганини изоҳлагани ҳақида хабар берилганди.