Ўзбекистон Республикаси президенти Шавкат Мирзиёев раислигида видеоселектор йиғилиши ўтказилаётгани хабар берилганди. Унда ҳуқуқбузарликлар профилактикаси ва жиноятчиликка қарши курашиш борасидаги ҳамкорлик, бу борада амалга оширилган ишлар ва келгусидаги устувор вазифалар муҳокама қилинмоқда.

Видеоселектор йиғилишида иштирок этган KUN.UZ мухбирининг хабар беришича, президент Фарғона вилояти Фарғона тумани Ёрдон қишлоғида қайнонасини уриб ўлдирган қотил келин масаласига катта урғу берди. 

"Нега бирорта мақола ўқимадим, нега чиқишлар қилинмади. Мен сизларга ҳар видеоселекторда тайёр мавзу айтаяпман. Жамоатчилик, мутасаддилар бу мавзуларни нашрларда кўтариб чиқмаяпти. Наҳотки, ўзбек оиласида келин ўз қайнонасининг қотилига айланса", - деди давлат раҳбари. 

Шунингдек, Шавкат Мирзиёев маҳаллалар кесимида содир этилган жиноятларга тўхталди. Тошкент вилоятида мавжуд 1600та маҳалланинг 931 тасида жиноят содир этилган. Қайд этилишича, бу энг юқори кўрсаткич. Самарқанд вилоятининг 1889 маҳалласидан 996 тасида. Жиззах вилоятининг 80 фоиз маҳалласида жиноят содир этилгани айтилди.